തിരുവനന്തപുരം : കോട്ടയ്ക്കകത്ത് അനന്തവിലാസം കൊട്ടാരത്തിൽ കേരള ചരിത്രവും പൈതൃകവുമുള്ള സാംസ്‌കാരിക സൗധം തുറന്നു. ലളിതകലാ അക്കാഡമിയുടെ ആർട്ട് ഗ്യാലറിയും വില്പന കൗണ്ടറും കേരള ചരിത്രവും പൈതൃകവും പ്രദർശിപ്പിക്കുന്ന ഫോട്ടോ ഗ്യാലറി,ആറൻമുള വാസ്തുവിദ്യാ ഗുരുകുലത്തിന്റെ ചുമർ ചിത്ര ഗ്യാലറിയും ചേർത്ത് ഒരു ചിത്രമാളികയും ഉൾപ്പെടുന്നതാണ് സാംസ്‌കാരിക സൗധം. മന്ത്രി എ.കെ ബാലൻ സാംസ്‌കാരിക സൗധം ഉദ്ഘാടനം ചെയ്തു. കലാകാരൻമാർക്ക് വിപണനത്തിന് സൗകര്യം ഒരുക്കുന്നതിന് 20 റൂറൽ ആർട്ട് ഹബ്ബ് രൂപീകരിച്ചതായും മന്ത്രി പറഞ്ഞു.
ചടങ്ങിൽ മന്ത്രി രാമചന്ദ്രൻ കടന്നപ്പള്ളി അദ്ധ്യക്ഷത വഹിച്ചു .കൊട്ടാരത്തിൽ തുടങ്ങിയ സാംസ്‌കാരിക ഉന്നതസമിതി കാര്യാലായം, ടി.കെ രാമകൃഷ്ണൻ ഹാൾ എന്നിവയുടെ ഉദ്ഘാടനവും നടന്നു. പുരാരേഖ വകുപ്പിന്റെ കേരളചരിത്ര ചിത്രീകരണ പദ്ധതിയുടെ ഭാമായി വാസ്തുവിദ്യാ ഗുരുകുലം കലാകാരന്മാർ രചിച്ച ചിത്രങ്ങൾ, സാംസ്‌കാരിക ഉന്നതസമിതി ബുള്ളറ്റിൻ എന്നിവ പ്രകാശനം ചെയ്തു.വാസ്തുവിദ്യാ ഗുരുകുലം ചെയർമാൻ ടി.കെ.എ നായർ, സാംസ്‌കാരിക സെക്രട്ടറി റാണി ജോർജ്ജ്, സാംസ്‌കാരിക ഉന്നത സമിതി സെക്രട്ടറി ഡോ. പ്രഭാകരൻ പഴശ്ശി, ലളിതകലാ അക്കാഡമി ചെയർമാൻ നേമം പുഷ്പരാജ്, ബുക്ക്മാർക്ക് സെക്രട്ടറി എ. ഗോകുലേന്ദ്രൻ, പുരാരേഖ വകുപ്പ് ഡയറക്ടർ ജെ. റജികുമാർ, സാംസ്‌കാരിക വകുപ്പ് ഡയറക്ടർ ടി.ആർ. സദാശിവൻ നായർ എന്നിവർ ചടങ്ങിൽ പങ്കെടുത്തു.