തിരുവനന്തപുരം: കേരള പബ്ലിക് സർവീസ് കമ്മിഷൻ നടത്തുന്ന വിവിധ പരീക്ഷകൾക്ക് ഹാജരാകുന്ന കൊവിഡ് പോസിറ്റീവ് ആയ ഉദ്യോഗാർത്ഥികൾ പരീക്ഷ എഴുതുന്ന ജില്ലയിലെ പി.എസ്.സി. ജില്ലാ ഓഫീസുമായി ബന്ധപ്പെടണമെന്ന് അധികൃതർ അറിയിച്ചു. രോഗബാധിതർക്ക് അനന്തര നിർദ്ദേശങ്ങൾ ആഫീസുകളിൽ നിന്നും നൽകും.

അഭിമുഖ തീയതിയും സെന്ററും മാറ്റി

ഹയർ സെക്കൻഡറി സ്‌കൂൾ ടീച്ചർ കൊമേഴ്സ് (ജൂനിയർ) തസ്തികയ്ക്കായി 6 ന് പി.എസ്.സി. തിരുവനന്തപുരം ആസ്ഥാന ഓഫീസിൽ നടത്താനിരുന്ന അഭിമുഖം, 4, 5 തീയതികളിൽ തിരുവനന്തപുരം ആസ്ഥാന ഓഫീസിൽ നിശ്ചയിച്ചിട്ടുള്ള പാലക്കാട് ജില്ലയിൽ നിന്നുള്ള ഉദ്യോഗാർത്ഥികളുടെ അഭിമുഖം എന്നിവ 24, 25 തീയതികളിൽ പി.എസ്.സി. പാലക്കാട് ജില്ലാ ഓഫീസിൽ നടത്തും.കൂടുതൽ വിവരങ്ങൾക്ക് ജി.ആർ. 5 വിഭാഗവുമായി ബന്ധപ്പെടണം.ഫോൺ- 0471 2546439.

കായികക്ഷമതാ പരീക്ഷ

തിരുവനന്തപുരം ജില്ലയിൽ വനംവകുപ്പിൽ ഫോറസ്റ്റ് ഡ്രൈവർ (കാറ്റഗറി നമ്പർ 120/17) തസ്തികയ്ക്കായുള്ള ശാരീരിക അളവെടുപ്പും കായികക്ഷമതാ പരീക്ഷയും 10, 11 തീയതികളിൽ രാവിലെ 6 മുതൽ പേരൂർക്കട എസ്.എ.പി. ഗ്രൗണ്ടിൽ നടത്തും. ഉദ്യോഗാർത്ഥികൾ അഡ്മിഷൻ ടിക്കറ്റ്, അസ്സൽ തിരിച്ചറിയൽ രേഖ, 24 മണിക്കൂറിനകം ലഭിച്ച കൊവിഡ് നെഗറ്റീവ് ആണെന്ന് തെളിയിക്കുന്ന സർട്ടിഫിക്കറ്റ് എന്നിവ സഹിതം എത്തിച്ചേരണം.

അഭിമുഖം

ആരോഗ്യവകുപ്പിൽ ഡെന്റൽ ഹൈജീനിസ്റ്റ് ഗ്രേഡ് 2 (മൂന്നാം എൻ.സി.എ.- ഒ.ബി.സി.) (കാറ്റഗറി നമ്പർ 238/19) തസ്തികയുടെ തിരഞ്ഞെടുപ്പുമായി ബന്ധപ്പെട്ടുള്ള ഇന്റർവ്യൂ 11 ന് പി.എസ്.സി ആസ്ഥാന ഓഫീസിൽ നടത്തും. അറിയിപ്പ് ലഭിക്കാത്തവർ ജി.ആർ.6 വിഭാഗവുമായി ബന്ധപ്പെടണം.ഫോൺ- 0471 2546364 .
സാങ്കേതിക വിദ്യാഭ്യാസ വകുപ്പിലെ അസിസ്റ്റന്റ് പ്രൊഫസർ ഇൻ സാനിട്ടറി കെമിസ്ട്രി (എൻജിനിയറിംഗ് കോളേജുകൾ) (കാറ്റഗറി നമ്പർ 402/17) തസ്തികയുടെ ഇൻർവ്യൂ 11, 12 തീയതികളിൽ പി.എസ്.സി ആസ്ഥാന ഓഫീസിൽ നടത്തും.കൊവിഡ് രോഗബാധിതരും ക്വാറന്റൈനിൽ കഴിയുന്നവരും രേഖകൾ ഹാജരാക്കിയാൽ ഇന്റർവ്യൂ തീയതി മാറ്റി നൽകും. അറിയിപ്പ് ലഭിക്കാത്ത ഉദ്യോഗാർത്ഥികൾ ജി.ആർ. 9 വിഭാഗവുമായി ബന്ധപ്പെടണം.ഫോൺ- 0471 2546446 .

ഒ.എം.ആർ പരീക്ഷ
പൊതു വിദ്യാഭ്യാസ വകുപ്പിൽ യു.പി. സ്‌കൂൾ അസിസ്റ്റന്റ് (കാറ്റഗറി നമ്പർ 517/19) തസ്തികയുടെ തിരഞ്ഞെടുപ്പുമായി ബന്ധപ്പെട്ടുള്ള ഒബ്ജക്ടീവ് മാതൃകയിലുള്ള പരീക്ഷ (ഒ.എം.ആർ മൂല്യനിർണയം) 7 ന് ഉച്ചയ്ക്ക് 1.30 മുതൽ 3.15 വരെ തിരുവനന്തപുരം ജില്ലയിലെ വിവിധ കേന്ദ്രങ്ങളിൽ നടത്തും. വ്യാവസായിക പരിശീലന വകുപ്പിൽ ജൂനിയർ ഇൻസ്ട്രക്ടർ (പെയിന്റർ-ജനറൽ) (കാറ്റഗറി നമ്പർ 87/19), ആഗ്രോ മെഷീനറി കോർപ്പറേഷൻ ലിമിറ്റഡിൽ പെയിന്റർ (കാറ്റഗറി നമ്പർ 320/19), കേരള സ്റ്റേറ്റ് വാട്ടർ ട്രാൻസ്‌പോർട്ടിൽ പെയിന്റർ (എൻ.സി.എ.- പട്ടികജാതി) (കാറ്റഗറി നമ്പർ 365/19) തസ്തികകളിലേക്കുള്ള തിരഞ്ഞെടുപ്പിനായി 16 ന് രാവിലെ 10.30 മുതൽ 12.15 വരെ നടത്താനിരുന്ന ഒ.എം.ആർ. പരീക്ഷയുടെ അഡ്മിഷൻ ടിക്കറ്റുകൾ പ്രൊഫൈലിൽ നിന്ന് ഡൗൺലോഡ് ചെയ്യാം.