സൗഹൃദങ്ങൾക്ക് ഏറെ പ്രാധാന്യം കൊടുക്കുന്ന താരമാണ് നസ്രിയ. വലിയൊരു സുഹൃത്‌വലയവും നസ്രിയയ്ക്കുണ്ട്. വിവാഹത്തിന് ശേഷം അപൂർവമായേ സിനിമകളിൽ പ്രത്യക്ഷപ്പെടാറുള്ളൂവെങ്കിലും സോഷ്യൽ മീഡിയയിൽ വളരെ സജീവമായ നസ്രിയ ഇടയ്ക്കിടെ ജീവിതത്തിലെ വിശേഷങ്ങളും സുഹൃത്തുകൾക്കൊപ്പമുള്ള ചിത്രങ്ങളുമൊക്കെ സമൂഹമാദ്ധ്യമങ്ങളിൽ പങ്കുവയ്ക്കാറുണ്ട്. നസ്രിയ സമൂഹമാദ്ധ്യമങ്ങളിൽ പങ്കുവച്ച ഏറ്റവും പുതിയ ചിത്രങ്ങളാണ് ഇപ്പോൾ ആരാധകരുടെ ശ്രദ്ധ കവരുന്നത്. നസ്രിയയ്ക്ക് ഒപ്പമുള്ള വ്യക്തിയാണ് ചിത്രങ്ങളുടെ ശ്രദ്ധ കവരുന്നത്. നടി ജ്യോതിർമയിയാണ് ചിത്രത്തിലുള്ളത്. പുതിയ ഹെയർസ്റ്റൈലിൽ പെട്ടെന്ന് ആളെ തിരിച്ചറിയുക ബുദ്ധിമുട്ടാണ്. ലോക്ക്‌ഡൗൺ കാലത്ത് തല മൊട്ടയടിച്ച ജ്യോതിർമയിയുടെ ചിത്രങ്ങൾ ശ്രദ്ധ നേടിയിരുന്നു. സംവിധായകനും സിനിമോട്ടോഗ്രാഫറും ജ്യോതിർമയിയുടെ ഭർത്താവുമായ അമൽ നീരദായിരുന്നു ജ്യോതിർമയിയുടെ ചിത്രങ്ങൾ സമൂഹമാദ്ധ്യമങ്ങളിൽ പങ്കുവച്ചത്. വിവാഹശേഷം വളരെ അപൂർവ്വമായി മാത്രമേ പൊതുപരിപാടികളിലും സോഷ്യൽ മീഡിയയിലും ജ്യോതിർമയി പ്രത്യക്ഷപ്പെടാറുള്ളൂ. അതിനാൽ ജ്യോതിർമയിയുടെ പുതിയ ചിത്രങ്ങളും ശ്രദ്ധ നേടി കഴിഞ്ഞു. 2015 ഏപ്രിലിൽ ആയിരുന്നു അമൽനീരദും ജ്യോതിർമയിയും തമ്മിലുള്ള വിവാഹം. വീട്ടുകാരുടെയും അടുത്ത സുഹൃത്തുക്കളുടെയും സാന്നിധ്യത്തിൽ ലളിതമായ ചടങ്ങുകളോടെയായിരുന്നു വിവാഹം.