സാധാരണ ജലദോഷം മുതൽ മാരകമായ അർബുദത്തിന്റെ വരെ ലക്ഷണമാണ് തലവേദന. പ്രത്യേകിച്ച് കാരണങ്ങളില്ലാതെയും ഗുരുതരമായ പല രോഗങ്ങൾക്ക് അനുബന്ധമായും തലവേദന പ്രത്യക്ഷപ്പെടാം. തലവേദനയെ തന്നെ പ്രത്യേക രോഗമെന്ന നിലയിലും മറ്റു പല രോഗങ്ങളുടെ ലക്ഷണമായും പരിഗണിക്കാം.

ചില തലവേദനകളുടെ കാരണം തലയുമായി ബന്ധപ്പെട്ട ഏതെങ്കിലും ഭാഗം പോലും ആവണമെന്നില്ല. വയറിനുണ്ടാകുന്ന അസ്വസ്ഥതകൾ, മലബന്ധം, അർശസ് തുടങ്ങിയവയും തലവേദനയ്ക്ക് കാരണമാകുന്നവയാണ്.

കാഴ്ച സംബന്ധമായ വൈകല്യമുള്ളവർ കണ്ണട വച്ച് പരിഹരിക്കാവുന്ന വിഷമതകളിൽ നിർബന്ധമായും ശരിയായ കാഴ്ച പരിശോധനയ്ക്കുശേഷം അനുയോജ്യമായ കണ്ണടകൾ ഉപയോഗിച്ച് പരിഹരിക്കാവുന്നതാണ്. എന്നാൽ,​ ചിലർക്ക് ചിലരെ കാണുന്നത് തന്നെ തലവേദനയാണ്. ചില സാഹചര്യങ്ങളിൽ 'എനിക്കിന്ന് എന്തായാലും തലവേദന ഉറപ്പാണ്' എന്നുപറയുന്നവരെയും കാണാം. അത്തരക്കാർക്ക് അന്ന് തലവേദന വരികയും ചെയ്യും. കാരണം തലവേദനയ്ക്ക് മാനസിക വ്യാപാരവുമായി അത്രമാത്രം ബന്ധമുണ്ട്. തലവേദനയുടെ കാരണങ്ങൾ പരിശോധിച്ചാൽ കൃത്യമായി വിശദീകരിക്കാൻ സാധിക്കാത്ത ചിലത് കൂടിയുണ്ടെന്ന് അറിയണം.

അതുപോലെതന്നെ തലവേദന മാറ്റുന്നതിനും ചിലർ ചില പ്രത്യേക രീതികൾ ശീലിച്ചിട്ടുണ്ടെന്നും കാണാം. ഉറങ്ങി എഴുന്നേറ്റാൽ, ഇരുട്ടുമുറിയിൽ ഇരുന്നാൽ, തണുത്ത വെള്ളത്തിൽ കുളിച്ചാൽ, ഭക്ഷണം കഴിച്ചാൽ, ചിലതൊക്കെ തല്ലിപ്പൊട്ടിച്ചാൽ... അങ്ങനെ പല ശീലങ്ങളുണ്ട്.

തുടർച്ചയായ തുമ്മൽ പോലുള്ള അലർജി രോഗവും സൈനസൈറ്റിസും കാരണമുണ്ടാകുന്ന മൂക്കിനുള്ളിലെ ദശ വളർച്ച, മൂക്കിന്റെ പാലം വളയുക, ശ്വാസോച്ഛ്വാസത്തിന് പ്രയാസമുള്ള വിധത്തിൽ മൂക്കടപ്പ്, ശക്തിയായി മൂക്ക് ചീറ്റുകയും വലിക്കുകയും ചെയ്യേണ്ട അവസ്ഥ, സൈനസ്സുകൾക്ക് പെട്ടെന്നുണ്ടാകുന്ന വീക്കം എന്നിവയോടനുബന്ധിച്ച് തലവേദനയും ചിലപ്പോൾ തലയ്ക്ക് ഭാരവും തോന്നിയേക്കാം.

പനി, ജലദോഷം, കണ്ണിന്റെ അസുഖങ്ങൾ, ചെവിയുടെ പ്രശ്നങ്ങൾ, കൊവിഡ്, ഡെങ്കിപ്പനി തുടങ്ങിയവയിലും തലവേദനയെ ലക്ഷണമായി കാണുന്നുണ്ട്.

തലനീരിറക്കം എന്ന് പൊതുവേ പറയുന്ന കഴുത്തുവേദന, വേദനയും വീക്കവും കഴുത്തിൽ തുടർച്ചയായി നിൽക്കുമ്പോൾ സംഭവിക്കാവുന്ന തേയ്മാനം, ഇടയ്ക്കിടയ്ക്ക് കഴുത്തിലുണ്ടാകുന്ന ഉളുക്ക് എന്നിവ കാരണം ഇടയ്ക്കിടെ പ്രത്യേകിച്ചും അദ്ധ്വാനം കൂടുതലുള്ളപ്പോൾ തലവേദനയും ചിലപ്പോൾ തലകറക്കവും ഉണ്ടാകുന്നു. രാത്രിയിലെ കുളി, കൈകൾ തലയ്ക്ക് വച്ച് കിടക്കുക, വലിയ തലയണയുടെ ഉപയോഗം, ഒരുവശം ചരിഞ്ഞു കിടക്കുക, കിടന്നുകൊണ്ട് ടി.വി കാണുകയോ വായിക്കുകയോ മൊബൈൽ നോക്കുകയോ ചെയ്യുക, കട്ടിലിന്റെ പടിയിലോ സോഫയുടെ കയ്യിലോ തല ഉയർത്തിവെച്ചു കിടക്കുക, തണുത്തവയും തൈരും സ്ഥിരമായി കഴിക്കുക തുടങ്ങിയവ കാരണം കഴുത്തിലെ പ്രയാസം വർദ്ധിച്ച് തല വേദന അനുഭവപ്പെടാം.

കഴുത്തിലും തോളിനും ഉണ്ടാകുന്ന ക്ഷതങ്ങൾ, തുമ്മൽ കാരണം കഴുത്തിലുണ്ടാകുന്ന തുടർച്ചയായ ചലനങ്ങളും സൈനസൈറ്റിസ് കാരണമുള്ള വീക്കവും ക്രമേണ കഴുത്തിലെ കശേരുക്കൾക്ക് തേയ്മാനം ഉണ്ടാക്കുകയും തലവേദന സ്ഥിരമാകുകയും ചെയ്യാം.

ഭക്ഷണം കഴിക്കാതിരിക്കുന്നത്, അമിതമായി കഴിക്കുന്നത്, കൂടുതൽ ഉറങ്ങുന്നത്, ആവശ്യത്തിനും ശീലിച്ച സമയത്തും ഉറങ്ങാത്തത്, ഇടയ്ക്കിടെ ശുദ്ധജലം കുടിക്കാതിരിക്കുന്നത്, ലഹരിപാനീയങ്ങളും മദ്യവും അകത്താക്കുന്നത്, ചിലതരം മരുന്നുകൾ, രക്ത സഞ്ചാരവുമായി ബന്ധപ്പെട്ട രോഗങ്ങൾ, അതു കാരണമുണ്ടാകുന്ന തടസ്സങ്ങൾ, ചിലതരം ഗ്രന്ഥികൾ, കോശവളർച്ചയുമെല്ലാം തലവേദനക്ക് കാരണമാകാറുണ്ട്.

അകാരണമായതും പെട്ടെന്നുണ്ടാകുന്നതുമായ തലവേദനകളിൽ പക്ഷാഘാതം പോലുള്ള രോഗങ്ങളുടെ തുടക്കമാണോ എന്ന് സംശയിക്കേണ്ടതുണ്ട്. തലപെരുപ്പും തലകറക്കവും കൂടിയുണ്ടെങ്കിൽ പ്രത്യേകിച്ചും.

തണുത്ത കാലാവസ്ഥയിൽ, തണുത്തത് കഴിക്കുമ്പോഴും തണുത്തവെള്ളത്തിൽ കുളിക്കുമ്പോഴും ഞരമ്പുകൾക്കും ധമനികൾക്കും താൽക്കാലികമായുണ്ടാകുന്ന ചുരുക്കം തലവേദനയ്ക്കു കാരണമാകുന്നു. വേനൽക്കാലത്ത് ശരീരത്തിന്റെ താപം വീണ്ടും വർദ്ധിപ്പിക്കുന്ന ഭക്ഷണങ്ങൾ, ശീലങ്ങൾ, ശരീരത്തിലെ ജലസാന്നിദ്ധ്യം കുറഞ്ഞു പോവുക എന്നിവയും തലവേദനയെയുണ്ടാക്കുന്നു.അമിതമായ വിയർപ്പും, ആവശ്യത്തിന് വെള്ളം കുടിയ്ക്കാതിരിക്കുന്നതും തലവേദനയ്ക്ക് കാരണമാണ്.

പല്ലുകൾക്കുണ്ടാകുന്ന പോട്, വിടവ്, മറ്റു കുഴപ്പങ്ങൾ, വിസ്ഡം ടീത്ത് പൊട്ടി മുളക്കുമ്പോയുള്ള ബുദ്ധിമുട്ടുകൾ എന്നിവയിലും തലവേദന കൂടിച്ചേരുന്നു.

ഞരമ്പ് സംബന്ധമായ പ്രശ്നങ്ങളുള്ളവരിൽ തലവേദന പ്രധാന ലക്ഷണമാണ്. ഉദാഹരണത്തിന് ട്രൈജെമിനൽ ന്യൂറാൾജിയ. അമിതമായ വായന, ശക്തമായ വെളിച്ചം, കണ്ണുകളെ വിശ്രമമില്ലാതെ ഉപയോഗിക്കുക, അധികമായി ടിവി, കമ്പ്യൂട്ടർ, മൊബൈൽ എന്നിവ ഉപയോഗിക്കുക, വായിക്കുമ്പോൾ ശരിയായ അകലവും ശരിയായ ശാരീരിക രീതിയും പാലിക്കാതിരിക്കുക, കിടന്നു വായിക്കുക, ശരിയായ കണ്ണട ഉപയോഗിക്കാതെയുള്ള വായന തുടങ്ങിയവയെല്ലാം കണ്ണുകളിലുണ്ടാക്കുന്ന അമിതമായ സമ്മർദ്ദം തലവേദനയേയും ഉണ്ടാക്കും.

തലവേദനയാകുന്ന ആഹാരം ...

വിരുദ്ധാഹാരങ്ങൾ ഉപയോഗിക്കുമ്പോഴും മറ്റും ആമാശയത്തിലുണ്ടാകുന്ന വിഷ സ്വഭാവവും അസിഡിറ്റി, അൾസർ തുടങ്ങിയ രോഗങ്ങളും ഗ്യാസിന്റെ ശല്യം വർദ്ധിപ്പിക്കുന്ന ദഹനപ്രശ്നങ്ങളും, മലബന്ധവും, അർശസുമെല്ലാം തലവേദനയെ ഉണ്ടാക്കുക തന്നെ ചെയ്യും.

മൈഗ്രയിൻ തലവേദന എന്ന കാരണം പറഞ്ഞ് ചികിത്സയ്ക്കെത്തുന്ന രോഗികളിൽ മിക്കവരിലും വരുത്തുന്ന ഭക്ഷണരീതികളിലെ ക്രമീകരണങ്ങളും ഉറക്ക വ്യത്യാസങ്ങളും മാനസിക സമ്മർദ്ദം കുറയ്ക്കുവാനുള്ള മാർഗ്ഗങ്ങളും തലവേദനയെ കുറയ്ക്കുന്നതായി കാണുന്നുണ്ട്. ചില തലവേദനകളിൽ മരുന്നിന് രണ്ടാം സ്ഥാനമേയുള്ളൂ എന്നതാണ് യാഥാർത്ഥ്യം.

സന്ധികളെ ബാധിക്കുന്ന വാതസംബന്ധമായ രോഗങ്ങൾ കാരണമുള്ള ഇ.എസ്.ആർ, എ.എസ്.ഒ, റുമറ്റോയിഡ് ഫാക്ടർ എന്നിവയുടെ വർദ്ധനയിൽ പല അവസ്ഥകളിലും തലവേദന കൂടി കാണുന്നുണ്ട്. പ്രത്യേകിച്ച്,​ തോൾ, കഴുത്ത് എന്നീ സന്ധികളെ ബാധിച്ചുണ്ടാകുന്ന ആർത്രൈറ്റിസിൽ.

ആധുനിക ഭക്ഷണ രീതിയിലെ വ്യത്യാസവും ഭക്ഷണം പാകം ചെയ്യുന്നതിലെ വ്യത്യാസവും കൊണ്ട് പലരിലും പ്രത്യേകിച്ചും സ്ത്രീകളിൽ കാണുന്ന ഒരു പ്രധാന വില്ലനാണ് അനീമിയ അഥവാ വിളർച്ച രോഗം. ഈ രോഗത്തിന്റെയും പ്രധാന ലക്ഷണങ്ങളിലൊന്നായി തലവേദന കൂടിയുണ്ടാകും.

തലവേദനയുള്ളവർ കാരണം എന്തെന്ന് മനസ്സിലാക്കി ചികിത്സിയ്ക്കുന്നതിനൊപ്പം തലവേദന കുറയ്ക്കുന്നതിനുള്ള ആയുർവേദ മരുന്നുകൾ, തലയിൽ തേയ്ക്കാനുള്ള എണ്ണ, പുറമേ പുരട്ടുന്ന തൈലങ്ങളും ലേപങ്ങളും യോഗ തുടങ്ങിയവയും സ്വീകരിക്കേണ്ടിവരും.

തലവേദനയുണ്ടാകുമ്പോൾ വേദന സംഹാരികളെ ആശ്രയിക്കുന്ന രീതി താല്ക്കാലിക ശമനം നൽകുമെങ്കിലും പിന്നീട് അത് ശല്യമായി മാറുന്നതിനും മരുന്നിന്റെ ഉപയോഗം അതിനെക്കാൾ ബുദ്ധിമുട്ടിക്കുന്ന പ്രശ്നങ്ങളായി മാറുകയും ചെയ്യും.