മുടപുരം: കേന്ദ്ര സർക്കാരിന്റെ തൊഴിലാളി വിരുദ്ധ കർഷകദ്രോഹ നയങ്ങൾക്കെതിരെ സംയുക്ത ട്രേഡ് യൂണിയനുകളുടെ നേതൃത്വത്തിൽ 26ന് നടത്തുന്ന ദേശീയ പൊതു പണിമുടക്ക് വിജയിപ്പിക്കണമെന്ന് സംയുക്ത ട്രേഡ് യൂണിയൻ ആറ്റിങ്ങൽഏരിയ കൺവെൻഷൻ ആവശ്യപ്പെട്ടു. പണിമുടക്കിനോടനുബന്ധിച്ച് 20 നകം മേഖലാകൺവെൻഷനുകളും യൂണിയനുകളുടെ നേതൃത്വത്തിൽ തൊഴിലാളികളുടെ ജനറൽ ബോഡികളും ചേരും. 9, 10 തീയതികളിൽ തൊഴിൽ മേലധികാരികൾക്ക് പണിമുടക്ക് നോട്ടീസുകളും 21 ന് തൊഴിൽ കേന്ദ്രങ്ങളിലും സ്ഥാപനങ്ങൾക്ക് മുന്നിലും പ്രതിഷേധ സമരങ്ങളും 22 മുതൽ 25 വരെ വ്യവസായ കേന്ദ്രങ്ങളിലും തൊഴിൽ ശാലകൾക്ക് മുന്നിലും ചെറു പ്രകടനങ്ങളും 25ന് വൈകിട്ട് എല്ലാ മേഖലയിലും പന്തം കൊളുത്തി പ്രകടനവും നടത്തും. 26ന് പണിമുടക്ക് ദിവസം ആറ്റിങ്ങലിൽ കൊവിഡ് മാനദണ്ഡങ്ങൾ പാലിച്ച് ചെറു പ്രകടനങ്ങളും നടത്തും. സി.ഐ.ടി.യു ജില്ലാ സെക്രട്ടറി അഞ്ചുതെങ്ങ് സുരേന്ദ്രൻ കൺവെൻഷൻ ഉദ്ഘാടനം ചെയ്തു. മണമ്പൂർ ഗോപകുമാർ (എ.ഐ.ടി.യു.സി) അദ്ധ്യക്ഷത വഹിച്ചു. ഇല്യാസ് (ഐ.എൻ.ടി.യു.സി) സംസാരിച്ചു. സി.ഐ.ടി.യു ജില്ലാ കമ്മിറ്റിയംഗം വി. വിജയകുമാർ സ്വാഗതവും ഏരിയ കമ്മിറ്റിയംഗം ആർ.പി. അജി നന്ദിയും പറഞ്ഞു.