തിരുവനന്തപുരം: ശ്രീഹരിക്കോട്ടയിലെ സതീഷ് ധവാൻ വിക്ഷേപണകേന്ദ്രത്തിൽ നിന്ന് ഉപഗ്രഹങ്ങളുമായി റോക്കറ്റ് കുതിച്ചുയരുമ്പോൾ തുമ്പയിലെ വി.എസ്.എസ്.സി.കേന്ദ്രത്തിലെ ലോഞ്ച് കൺട്രോൾ സെന്ററിൽ നിന്നായിരിക്കും ഇനി മുതൽ അതു നയന്ത്രിക്കുന്നത്. ആദ്യമായാണ് ഐ.എസ്.ആർ.ഒ. ശ്രീഹരിക്കോട്ടയ്ക്ക് പുറത്ത് റോക്കറ്റ് നിയന്ത്രണ കേന്ദ്രം തുറക്കുന്നത്. കൊവിഡ് പശ്ചാത്തലത്തിൽ ശാസ്ത്രജ്ഞർക്കും എൻജിനീയർമാർക്കും ശ്രീഹരിക്കോട്ടയിലേക്ക് പോകാൻ തടസ്സം നേരിട്ടതാണ് കാരണം. ഒാരോ വിക്ഷേപണത്തിനും ഇരുന്നൂറോളം വിദഗ്ദ്ധരാണ് പോയിരുന്നത്. ലോഞ്ച് കൺട്രോൾ സംവിധാനം സജ്ജമാക്കിക്കഴിഞ്ഞു. ശനിയാഴ്ചത്തെ പി.എസ്. എൽ.വി.സി-49 റോക്കറ്റിന്റെ വിക്ഷേപണത്തിലാണ് ആദ്യമായി പരീക്ഷിച്ചത്. പകുതിയോളം വിദഗ്ദ്ധർ തുമ്പയിലും ബാക്കിയുള്ളവർ ശ്രീഹരിക്കോട്ടയിലും കാര്യങ്ങൾ നിയന്ത്രിച്ചു. അടുത്ത വിക്ഷേപണങ്ങളിൽ നിയന്ത്രണം തുമ്പയിലുമുണ്ടാകും.

തുമ്പയിലെ സംവിധാനം

# വിക്ഷേപണത്തറയിലെ റോക്കറ്റും മിഷൻ കൺട്രോൾ കേന്ദ്രവും ഭൂമിക്കടിയിലൂടെ കേബിളുകൾ വഴി

യാണ് ബന്ധിപ്പിച്ചിരിക്കുന്നത്.

# കൺട്രോൾ കേന്ദ്രത്തിലെ കമ്പ്യൂട്ടറുകൾ

പ്രത്യേകലൈനിലൂടെ തിരുവനന്തപുരത്തെ കേന്ദ്രവുമായി ഘടിപ്പിച്ചു.

# ശ്രീഹരിക്കോട്ടയിലെ മാതൃകയിൽ നൂറോളം കമ്പ്യൂട്ടറുകളും ഡിജിറ്റൽ വാൾ ഡിസ് പ്ളെ സ്ക്രീനുകളും ഹോട്ട് ലൈൻ കമ്മ്യൂണിക്കേഷൻ സംവിധാനങ്ങളും അലർട്ട് ബട്ടണുകളും അടങ്ങിയതാണ് തുമ്പയിലെ റോക്കറ്റ് കൺട്രോൾ സെന്റർ.

ലോഞ്ച് കൺട്രോൾ

റോക്കറ്റ് സജ്ജമാക്കിയശേഷം ഉപഗ്രഹവുമായി കുതിച്ചുയർന്ന് ദൗത്യം പൂർത്തിയാക്കുന്നതുവരെയുള്ള നിയന്ത്രണമാണ് ലോഞ്ച് കൺട്രോൾ സെന്ററിനുള്ളത്. മുന്നോറോളം എൻജിനിയർമാരും ശാസ്ത്രജ്ഞരും അടങ്ങുന്ന ടീമാണ് നിയന്ത്രിക്കുന്നത്. ഇരുന്നൂറോളം പേർ സിസ്റ്റം ബോർഡുകളുടെ മുന്നിലും നൂറോളം പേർ റോക്കറ്റിനടുത്തും ഉണ്ടാകും. അഞ്ചു മുതൽ പത്തു ദിവസംവരെ ദൗത്യം നീണ്ടുനിൽക്കും. മൂന്ന് ഘട്ടങ്ങളുണ്ട്. ഒാരോഘട്ടത്തിലും മൂന്ന് തലം എന്ന ക്രമത്തിൽ അരലക്ഷത്തിലേറെ പോയിന്റുകൾ നിരീക്ഷിച്ച് ഉറപ്പ് വരുത്തുന്ന സംവിധാനമാണിത്. ഇതിലെ സൂക്ഷ്മതയാണ് റോക്കറ്റിന്റെ വിജയത്തിന് അടിസ്ഥാനം.

നേട്ടങ്ങൾ

*തിരുവനന്തപുരത്തെ വി.എസ്. എസ്.സി.,എൽ.പി. എസ്.സി, ഐ.ഐ.എസ്.യു. ടീമുകളെ വേഗത്തിൽ ഏകോപിപ്പിക്കാം.

*ശ്രീഹരിക്കോട്ടയിലേക്ക് പോകുന്ന വിദഗ്ധരുടെ എണ്ണം നാലിലൊന്നായി കുറയ്ക്കാം.

* കൂടുതൽ വിക്ഷേപണങ്ങൾക്ക് അവസരമൊരുക്കാം.

ഇന്ധനം നിറച്ച റോക്കറ്റ്

നിന്നത് പത്തുമാസം

കൊവിഡ് കാരണം പി.എസ്.എൽ.വി.സി-49 റോക്കറ്റ് ശ്രീഹരിക്കോട്ടയിലെ വിക്ഷേപണത്തറയിൽ കുത്തനെ നിന്നത് പത്തുമാസം. അതിലെ ഖരഇന്ധനം കത്തുമോ എന്ന ആശങ്കയുണ്ടായിരുന്നു. ഇതിന്റെ രാസ,താപ പരിശോധനകളെല്ലാം നടത്തിയശേഷമായിരുന്നു വിക്ഷേപണം. ആദ്യമായാണ് ഇങ്ങനെ ചെയ്യേണ്ടിവന്നത്.