കോവളം: വിഴിഞ്ഞം തുറമുഖ കവാടത്തിനു സമീപം പിക്കപ്പ് വാൻ കുഴിയിലേക്ക് മറിഞ്ഞു. ഡ്രൈവർ സീറ്റ് ബെൽറ്റ് ധരിച്ചിരുന്നതിനാൽ അത്ഭുതകരമായി രക്ഷപ്പെട്ടു. തുറമുഖ കവാടം സ്ഥിതി ചെയ്യുന്ന മുല്ലൂരാണ് അപകടം നടന്നത്. കൊല്ലത്ത് നിന്ന് തമിഴ്നാട് തേങ്ങാപ്പട്ടണത്തേയ്ക്ക് പോകുകയായിരുന്ന പിക്കപ്പ് വാനാണ് റോഡിനു വലതുവശത്തെ കുഴിയിലേക്ക് മറിഞ്ഞത്. എതിർദിശയിൽ വന്ന ബൈക്ക് യാത്രക്കാരൻ പെട്ടെന്ന് മുന്നിലേക്ക് കയറിയപ്പോൾ ഡ്രൈവർ വലതുഭാഗത്തേക്ക് വെട്ടിക്കുകയായിരുന്നു. ഈ ഭാഗത്ത് 25 അടിയിലേറെ താഴ്ചും 2 വീടുകളുമുണ്ട്. എന്നാൽ വാഹനം വീടിനു മുകളിലേക്ക് പതിക്കാത്തതിനാൽ വൻ ദുരന്തമാണ് ഒഴിവാക്കിയത്. വിഴിഞ്ഞം പൊലീസ് സ്ഥലത്തെത്തി ഗതാഗത ക്രമീകരണങ്ങൾ നടത്തിയ ശേഷം വാൻ ക്രെയിൻ ഉപയോഗിച്ച് ഉയർത്തി.