ബംഗളൂരു: മയക്കുമരുന്ന് കേസുമായി ബന്ധപ്പെട്ട കള്ളപ്പണ, ബിനാമി ഇടപാടിൽ പരപ്പന അഗ്രഹാര ജയിലിൽ റിമാൻഡിൽ കഴിയുന്ന ബിനീഷ് കോടിയേരിയെ പ്രത്യേക സെല്ലിലേക്ക് മാ​റ്റി. കൊവിഡ് പരിശോധനാഫലം ലഭിച്ച ശേഷമേ മ​റ്റ് പ്രതികളെ പാർപ്പിക്കുന്ന ബ്ലോക്കിലേക്ക് മാ​റ്റുകയുള്ളൂ.

ബിനീഷ് ഭക്ഷണം കൃത്യമായി കഴിച്ചെന്നും മ​റ്റ് ആരോഗ്യ പ്രശ്നങ്ങളില്ലെന്നും ജയിൽ അധികൃതർ അറിയിച്ചു. സുരക്ഷ മുൻനിറുത്തി വരും ദിവസങ്ങളിലും പ്രത്യേക സെല്ലിൽ പാർപ്പിക്കാനും ജയിൽ അധികൃതർ ആലോചിക്കുന്നുണ്ട്. ജയിലിൽ 8498 ആണു ബിനീഷിന്റെ നമ്പർ. നേരത്തെ മയക്കുമരുന്ന് കേസിൽ അറസ്​റ്റിലായ മുഹമ്മദ് അനൂപ്, റിജേഷ് എന്നിവരെയും, സി.സി.ബി അറസ്​റ്റ് ചെയ്ത കന്നഡ സിനിമാ താരങ്ങളെയും ഇതേ ജയിലിലാണ് പാർപ്പിച്ചിട്ടുള്ളത്.

25 വരെയാണ് കോടതി ബിനീഷിനെ ജുഡിഷ്യൽ കസ്​റ്റഡിയിൽ വിട്ടത്. അടുത്ത ബുധനാഴ്ചയാണ് ബിനീഷിന്റെ ജാമ്യാപേക്ഷ കോടതി പരിഗണിക്കുന്നത്.

ബിനാമി ഇടപാടിൽ

അന്വേഷണം

ബിനീഷിന്റെയും ബിനാമികളുടെയും പേരിലുള്ള കമ്പനികളുടെ സാമ്പത്തിക ഇടപാടുകൾ ഇ.ഡി വിശദമായി അന്വേഷിക്കുകയാണ്. ബിനീഷ് ഡയറക്ടറായ ബംഗളൂരുവിലെ ബീ ക്യാപി​റ്റൽ ഫോറെക്സ് ട്രേഡിംഗ്, കേരളത്തിലെ ബീ ക്യാപി​റ്റൽ ഫൈനാൻഷ്യൽ സർവീസസ്, ടോറസ് റെമഡീസ്, ലഹരിക്കേസിൽ അറസ്​റ്റിലായ കൊച്ചി സ്വദേശി അനൂപ് മുഹമ്മദും തിരുവില്വാമല സ്വദേശി റിജേഷ് രവീന്ദ്രനും ഡയറക്ടർമാരായ എറണാകുളത്തെ റിയാന, ബംഗളൂരുവിലെ യൗഷ് എന്നീ കമ്പനികളെക്കുറിച്ചാണ് അന്വേഷണം. ലഹരി ഇടപാടിൽ നിന്നു ലഭിച്ച പണം ഈ കടലാസു കമ്പനികളുടെ പേരിൽ വെളുപ്പിച്ചെന്നാണു സംശയം.