തിരുവനന്തപുരം: ഗാനഗന്ധർവൻ കെ.ജെ.യേശുദാസിന്റെ ശബ്ദം ഒരു സിനിമയ്ക്കു വേണ്ടി ആദ്യമായി റെക്കാഡ് ചെയ്യപ്പെട്ടിട്ട് ഇന്നലെ 59 വ‍ർഷം തികഞ്ഞു. എം.ബി. ശ്രീനിവാസൻ ചിട്ടപ്പെടുത്തി വിഖ്യാത ശബ്ദലേഖകൻ കോടീശ്വരറാവു റെക്കാഡ് ചെയ്ത 'ജാതിഭേദം മതദ്വേഷം...' എന്നു തുടങ്ങുന്ന ഗുരുദേവ ശ്ലോകമായിരുന്നു യേശുദാസ് ആദ്യം പാടിയത്. 'കാല്പാടുകൾ' എന്ന ചിത്രത്തിലായിരുന്നു ഈ ഗാനം.1961 നവംബർ 14നായിരുന്നു റെക്കാഡിംഗ്. പക്ഷേ, ചിത്രം റിലീസ് ചെയ്യാൻ വൈകി. 1962 സെപ്തംബർ ഏഴിനാണ് 'കാല്പാടുകൾ' റിലീസ് ചെയ്തത്. 1962 ഫെബ്രുവരി 23ന് പുറത്തു വന്ന 'വേലുത്തമ്പി ദളവ' എന്ന ചിത്രത്തിലെ 'പുഷ്പാഞ്ജലികൾ...' എന്ന ഗാനമാണ് യേശുദാസിന്റെ ശബ്ദത്തിൽ ആദ്യം തിയേറ്ററുകളിൽ മുഴങ്ങിയത്. അഭയദേവിന്റെ രചനയിൽ ദക്ഷിണാമൂർത്തിയാണ് ഈ ഗാനത്തിന് സംഗീതം നൽകിയത്. പിന്നീട് യേശുദാസ് വളർച്ചയുടെ ഓരോ ഘട്ടത്തിലും കൂടെ കൂട്ടിയത് ആദ്യം പാടിയ 'ജാതിഭേദം മതദ്വേഷം...' എന്നു തുടങ്ങുന്ന ഗുരുദേവ ശ്ലോകമായിരുന്നു. പൊതുചടങ്ങുകളിൽ എത്തുമ്പോഴെല്ലാം ആദ്യം ഈ ശ്ലോകം ചൊല്ലും.