ഒരു കാലത്ത് തെന്നിന്ത്യൻ സിനിമാലോകം കീഴടക്കിയ ചോക്ലേറ്റ് നായകനായിരുന്നു ആർ. മാധവൻ. ക്യൂട്ട് കണ്ണുള്ള, നുണക്കുഴിയുള്ള നായകൻ എന്നിങ്ങനെ മാധവന്റെ വിശേഷണങ്ങൾ നിരവധിയാണ്. മാധവൻ എന്ന പേരിനെ ചെറുതാക്കി മാഡി എന്നാണ് ആരാധകർ വിളിക്കാറുള്ളത്. അലൈപായുതേ അടക്കം ഹിറ്റ് സിനിമകളിൽ നായകനായിട്ടെത്തി താരം വലിയൊരു താരപദവി സ്വന്തമാക്കി. വർഷങ്ങളായി സിനിമാഭിനയ രംഗത്ത് പ്രവർത്തിക്കുന്ന മാധവന് ഒരുപാട് ആരാധികരുമുണ്ട്. സിനിമയിലെ ട്വിസ്റ്റ് പോലെ ജീവിതത്തിലും സരിത എന്ന സുന്ദരി കടന്ന് വതോടെ അതും പൂർത്തിയായി. ഇപ്പോഴിതാ ഒരു അഭിമുഖത്തിലൂടെ സിനിമകളെ കുറിച്ചും സരിതയുമായി പ്രണയത്തിലായ സാഹചര്യത്തെ കുറിച്ചുമൊക്കെ തുറന്ന് സംസാരിച്ചിരിക്കുകയാണ് താരം. "ഞാൻ എങ്ങനെ വെളുത്തു എന്നാണ് ഒരാൾ ട്വീറ്റിൽ ചോദിച്ചത്. വെളുക്കാനായി പ്രത്യേകിച്ച് ഒന്നും ചെയ്യാറില്ല. വെയിൽ കൊണ്ടാൽ പെട്ടെന്ന് തന്നെ ഇരുണ്ട് പോകുന്ന ചർമവുമാണ്. ഗോൾഫ് കളിച്ച് മടങ്ങി എത്തുമ്പോൾ നിറം മങ്ങും. അത് മാറുന്നതോടെ നിറം കൂടിയതായി ചിലർക്ക് തോന്നും. ഇതൊക്കെ തമാശയായി മാത്രമേ എടുക്കാറുള്ളു. വെളുപ്പും കറുപ്പും ഉയരവുമൊന്നുമല്ല ജീവിതത്തിൽ പ്രധാനം. നിങ്ങൾ നിങ്ങളിൽ എത്രത്തോളം കംഫർട്ടബിൾ ആണെന്ന് ചിന്തിക്കുക. ഒപ്പം പ്രവർത്തിക്കാൻ മറ്റുള്ളവർ എത്ര കംഫർട്ടബിൾ ആണെന്നും അറിയുക. അതുമാത്രം മതി എന്നാണ് ഞാൻ പറഞ്ഞത്. ബന്ധുക്കൾ ശുപാർശ ചെയ്തിട്ടാണ് സരിത എന്റെ ക്ലാസ് അറ്റൻഡ് ചെയ്യാൻ വന്നത്. ക്ലാസിൽ നിന്ന് ലഭിച്ച ആത്മവിശ്വാസത്തിന്റെ ബലത്തിൽ അവൾ എയർഹോസ്റ്റസ് ഇന്റർവ്യൂ പാസായി. കോഴ്സ് കഴിയുമ്പോഴേക്കും ഞങ്ങൾ പ്രണയത്തിലായി. 'അലൈപായുതേ' ക്ക് തൊട്ട് മുൻപായിരുന്നു വിവാഹം. വിവാഹശേഷം എന്റെ ചിത്രങ്ങളിൽ സരിത കോസ്റ്റ്യൂം ഡിസൈനറായി. നടന്റെ ഭാര്യയാകുന്നത് കുറച്ച് റിസ്കുള്ള കാര്യമാണെന്ന് അറിയാവുന്നതിനാൽ ലൊക്കേഷനിലേക്ക് ഒന്നിച്ചാണ് പോയിരുന്നത്.

ഒന്ന് രണ്ട് സിനിമയോടെ തന്നെ അഭിനയവും ഷൂട്ടിംഗുമൊക്കെ എങ്ങനെയെന്ന് സരിതയ്ക്ക് മനസിലായി. 2005 ലാണ് മകൻ വേദാന്ത് ജനിക്കുന്നത്. അതോടെ ചെന്നൈയിലേക്ക് താമസം മാറി. ഹിന്ദിയിൽ തിരക്കായപ്പോൾ വീണ്ടും മുംബൈയിലേക്ക്. ഈ വർഷം ആദ്യമാണ് ദുബായിലേക്ക് താമസം മാറിയത്." കരിയറിൽ വലിയ വിജയങ്ങൾ നേടിയിട്ടുള്ള ആളാണ് താനെന്ന് പറയുന്ന മാധവൻ അതിന്റെയൊന്നും ക്രെഡിറ്റ് എന്ത് കൊണ്ടോ തനിക്ക് ലഭിച്ചില്ലെന്നും അതിൽ വിഷമമില്ലെന്നും താരം പറയുന്നു. എല്ലാവർക്കും ഷാരുഖ് ഖാനും രജനികാന്തും ആകാൻ ആഗ്രഹം കാണും. പക്ഷേ റിലീസിന് മുൻപ് അവർ നേരിടുന്ന മാനസിക സംഘർഷം അനുഭവിക്കാൻ തന്നെ കിട്ടില്ല. അങ്ങനെ നോക്കുമ്പോൾ അമിതാഭ് ബച്ചനാണ് തന്റെ ഹീറോ എന്നും താരം വെളിപ്പെടുത്തുന്നു. കുടുംബത്തിലെ കാര്യങ്ങളെല്ലാം ഭാര്യയാണ് നോക്കുന്നതെന്നും മാധവൻ പറയുന്നു.

"സിനിമ ഹിറ്റാകുമോ എന്ന് എനിക്ക് മുൻകൂട്ടി പറയാനാകും. എന്റെ പൊട്ടിയ സിനിമകളുടെ ഭാവിയും പ്രവചിക്കാൻ കഴിഞ്ഞിരുന്നു. പൊതുവേ സാമ്പത്തിക കാര്യങ്ങളിൽ ഞാൻ വലിയ മിടുക്കനല്ല."