കിളിമാനൂർ: തദ്ദേശ സ്വയംഭരണ തിരഞ്ഞെടുപ്പ് പ്രചാരണത്തിന് കൊവിഡ് ഭീഷണിയായി തുടരുമ്പോൾ സമൂഹ മാദ്ധ്യമങ്ങളിലൂടെ സ്ഥാനാർത്ഥികൾക്കായി പ്രചാരണം നടത്താൻ ഇവന്റ് മാനേജ്മെന്റ് ഗ്രൂപ്പുകൾ രംഗത്ത്. സ്ഥാനാർത്ഥി പ്രഖ്യാപനം മുതൽ വിജയാഹ്ലാദം വരെയുള്ള എല്ലാ ഘട്ടങ്ങളെയും ഫോട്ടോ, വീഡിയോ, ആനിമേഷൻ എന്നിവയിലൂടെ ആൽബം രൂപത്തിൽ പുറത്തിറക്കിയാണ് പ്രചാരണം. ആൾക്കൂട്ടം ഒഴിവാക്കി കൊവിഡ് മാനദണ്ഡം പാലിച്ചു നടത്തുന്ന പ്രചാരണത്തിന് വീറും വാശിയും കുറയുമ്പോഴാണ് സമൂഹ മാധ്യങ്ങളിലൂടെയുള്ള ഇലക്ഷൻ പ്രചാരണത്തിന് ഇവന്റ് മാനേജ്മെന്റ് ഗ്രൂപ്പുകൾ രംഗത്തിറങ്ങിയത്. കൊവിഡിനെ തുടർന്ന് പ്രതിസന്ധിയിലായ സ്റ്റുഡിയോ പ്രവർത്തകരും നാടകകലാകാരന്മാരും സ്ക്രിപ്റ്റ് റൈറ്റർമാരും ഉൾപ്പെടുന്നതാണ് ഇവന്റ് മാനേജ്മെന്റ് ടീം.

സേവ് ദി ഡേറ്റിനു സമാനമായി ഷൂട്ടിംഗ്

സ്ഥാനാർത്ഥിയെ വോട്ടർമാർക്ക് പരിചയപ്പെടുത്തുന്നതാണ് ഇവരുടെ ആദ്യ പടി. വിവാഹ ചടങ്ങുകളുടെ സേവ് ദി ഡേറ്റ് പ്രോഗ്രാമിന് സമാനമായി സ്ഥാനാർത്ഥിയുടെ ഫോട്ടോകൾക്കും വീഡിയോകൾക്കുമൊപ്പം വീടും കുടുംബാംഗങ്ങളെയും ഷൂട്ട്‌ ചെയ്തു വോട്ടർമാരിലെത്തിക്കുകയാണ് ലക്ഷ്യം. വോട്ടർമാരെ നേരിൽ കാണലും വോട്ടഭ്യർത്ഥനയും കുശലാന്വേഷണങ്ങളും നാമനിർദേശ പത്രിക സമർപ്പണവുമെല്ലാം അടുത്ത ഘട്ടം. പഞ്ചായത്ത്‌ അംഗമായാൽ വാർഡ് കൈവരിക്കുന്ന നേട്ടങ്ങൾ വിശദീകരിച്ചുകൊണ്ടുള്ള സ്ഥാനാർത്ഥിയുടെ പ്രസംഗം, വീട് വീടാന്തരം കയറിയിറങ്ങുന്ന ദൃശ്യങ്ങൾ, വോട്ടർമാരുടെ പ്രതികരണം, സ്വീകരണ പരിപാടികൾ എന്ന് വേണ്ട പരസ്യ പ്രചാരണം അവസാനിച്ചാലും സമൂഹ മാദ്ധ്യമങ്ങളിൽ സ്ഥാനാർത്ഥിയെ വൈറലാക്കാനുള്ള മുഴുവൻ മാജിക്കുകളും ഇവർ പയറ്റും.

കോംബോ ഓഫർ

തിരഞ്ഞെടുപ്പ് പ്രചാരണത്തിന് കോമ്പോ ഓഫറുകളുമായും സ്ഥാനാർത്ഥികളെ സമീപിക്കുന്നുണ്ട് ഇവന്റ് ഗ്രൂപ്പുകളും പ്രിന്റിംഗ് പ്രസുകളും. 500 വലിയ പോസ്റ്റർ, ഇലക്ട്രിക് പോസ്റ്റുകളിൽ വയ്ക്കാൻ 500 ചെറിയ പോസ്റ്ററുകൾ, തിരഞ്ഞെടുപ്പ് ചിഹ്നത്തിന്റെ 200 പോസ്റ്റർ, 10 ബാനർ, 500 അഭ്യർത്ഥന നോട്ടീസ് എന്നിവ പതിനായിരം മുതൽ 15000 വരെയുള്ള ബഡ്ജറ്റിൽ തയ്യാറാക്കി നൽകുന്ന ഓഫറുകളാണ് സ്ഥാനാർത്ഥികൾക്ക് നൽകുന്നത്.