ബോളിവുഡിൽ നടിമാർ നേരിടുന്ന അവഗണനകളെ കുറിച്ചും കാസ്റ്റിംഗ് കൗച്ചിനെ കുറിച്ചും പല ചർച്ചകളും വെളിപ്പെടുത്തലുകളും അടുത്തകാലത്ത് ഉണ്ടായിട്ടുണ്ട്. സിനിമയിലെ തുടക്കകാലത്ത് വിചിത്ര കാരണങ്ങളാൽ പല ഇടങ്ങളിലും അവഗണിക്കപ്പെട്ടിട്ടുണ്ടെന്ന് വെളിപ്പെടുത്തി നടി തപ്സി പന്നുവാണ് ഇപ്പോൾ രംഗത്ത് വന്നിരിക്കുന്നത്. "നായകന്റെ ഭാര്യയ്ക്ക് തന്നെ ഇഷ്ടമല്ലെന്ന കാരണത്താൽ സിനിമയിൽ നിന്നും ഒഴിവാക്കപ്പെട്ടിട്ടുണ്ട്, നായകന് ഇഷ്ടപ്പെടാത്ത ഡയലോഗ് മാറ്റേണ്ടി വന്നിട്ടുണ്ട്, നയകനേക്കാൾ പ്രാധാന്യമുള്ള ഇൻട്രൊ നായികയ്ക്ക് വേണ്ടെന്ന വാശിയിൽ സീനുകൾ നീക്കം ചെയ്യപ്പെട്ടിട്ടുണ്ട്." ബോളിവുഡിനുള്ളിൽ ഇപ്പോഴും നിലനിൽക്കുന്ന പുരുഷാധിപത്യത്തെയും സ്വജനപക്ഷപാതത്തെയുമാണ് മുമ്പ് ഉണ്ടായ അനുഭവങ്ങളിലൂടെ തപ്സി ചൂണ്ടിക്കാണിക്കുന്നത്. ഒരു അഭിമുഖത്തിലാണ് തപ്സിയുടെ പ്രതികരണം."ഞാൻ സുന്ദരിയല്ലെന്നും കാണാൻ കൊള്ളില്ലെന്നുമൊക്കെ ആയിരുന്നു ആദ്യം പറഞ്ഞിരുന്ന കാരണങ്ങൾ. ഒരു സിനിമയുടെ അണിയറപ്രവർത്തകർ എന്നോട് പ്രതിഫലം കുറയ്ക്കാൻ ആവശ്യപ്പെട്ടു, എന്ത് കാരണത്താലാണ് എന്റെ പ്രതിഫലം മാത്രം കുറയ്ക്കുന്നത് എന്ന് ചോദിച്ചപ്പോൾ, ഹീറോയുടെ മുമ്പത്തെ പടം അത്ര ഓടിയില്ലെന്നായിരുന്നു മറുപടി. ഹീറോയുടെ പടം വിജയിക്കാത്തതിനാൽ ഞാൻ പ്രതിഫലം കുറച്ച് സഹകരിക്കണമെന്നായിരുന്നു ആവശ്യം. ഒരിക്കൽ ഹീറോയ്ക്ക് ഇഷ്ടപ്പെട്ടില്ലെന്ന കാരണത്താൽ ഞാൻ ഡബ്ബ് ചെയ്തിരുന്ന ഒരു ഡയലോഗ് മാറ്റി റെക്കാഡ് ചെയ്യാൻ ആവശ്യപ്പെട്ടിരുന്നു. എന്നാൽ മറ്റൊരാളുടെ ഇഷ്ടപ്രകാരം എന്റെ ഡയലോഗ് മാറ്റാൻ ഞാൻ തയ്യാറായില്ല. പിന്നീട് മറ്റൊരാളെക്കൊണ്ടാണ് ആ ഭാഗം റീറിക്കാഡ് ചെയ്യിപ്പിച്ചത്.." മറ്റൊരു ചിത്രത്തിൽ തന്റെ ഇൻട്രൊഡക്ഷൻ സീൻ പൂർണമായും ഒഴിവാക്കിയിട്ടുണ്ടെന്നും നായികയ്ക്ക് തന്നെക്കാൾ പ്രാധാന്യമുള്ള സീൻ വേണ്ടെന്നുള്ള നായകന്റെ വാശി ആയിരുന്നു അതിന് പിന്നിലെന്നും താരം വെളിപ്പെടുത്തുന്നു. താരങ്ങളുടെ മക്കൾക്ക് വേണ്ടി പലപ്പോഴും വഴി മാറിക്കൊടുക്കേണ്ടി വന്നതായും തപ്സി മുമ്പ് പറഞ്ഞിരുന്നു.

"പല നിർമ്മാതാക്കളും സംവിധായകരും ഈയടുത്ത കാലം വരെ ഞാനൊരു 'ബാഡ് ലക്ക് ' നടിയാണെന്ന് വിശ്വസിച്ചിരുന്നു. അതുകൊണ്ട് തന്നെ പലരും എന്നെ പരിഗണിച്ചിരുന്നില്ല..."

- തപ്സി പന്നു