കടയ്ക്കാവൂർ: കുപ്പിയിൽ ചിത്രം വരച്ച് കടയ്ക്കാവൂർ സ്വദേശിനി സ്വന്തമാക്കിയത് ഇരട്ട റെക്കാഡ്. കടയ്ക്കാവൂർ സ്വദേശിനി സുജിയാണ് ഇരട്ട റെക്കാഡ് സ്വന്തമാക്കിയത്. ലോക്ക് ഡൗൺ കാലത്ത് നേരം പോക്കിനായി തുടങ്ങിയ ബോട്ടിൽ ആർട്ടിലൂടെയാണ് സുജി ഈ നേട്ടം സ്വന്തമാക്കിയത്. ഇന്ത്യാ ബുക്ക്‌ ഒഫ് റെക്കാഡിനും ഏഷ്യ ബുക്ക്‌ ഒഫ് റെക്കാഡിനുമാണ് സുജി അർഹയായത്.

കടയ്ക്കാവൂർ സ്വദേശികളായ സുധീറിന്റെയും ബേബിയുടെയും മകളായ സുജി 50 മരുന്നുകളുടെ പേരും രാസഘടനയും ഉപയോഗവും ഒറ്റ കുപ്പിയിൽ വരച്ചാണ് റെക്കാഡ് നേടിയത്.

2 മണിക്കൂർ കൊണ്ടാണ് സുജി പെയിന്റിംഗ് ബ്രഷ് ഉപയോഗിച്ച് കുപ്പിയിൽ വരച്ചത്. കുട്ടിക്കാലം മുതൽ തന്നെ ചിത്രരചനയിൽ താല്പര്യം കാണിച്ച സുജി ലോക്ക്ഡൗൺ കാലത്താണ് കുപ്പികളിൽ ചിത്രം വരയ്ക്കാനും കരകൗശല വസ്തുക്കൾ ഉണ്ടാക്കാനും തുടങ്ങിയത്. ചിത്രരചന പഠിച്ചിട്ടില്ലെങ്കിലും ബി.ഫാം ബിരുദധാരിയായ സുജിക്ക് ഇന്നൊരു വരുമാന മാർഗം കൂടിയാണ് കല. art_soup2020 എന്ന തന്റെ ഇൻസ്റ്റാഗ്രാം പേജിൽ സുജിയുടെ വ്യത്യസ്ത ബോട്ടിൽ ഡിസൈനുകൾ പോസ്റ്റ്‌ ചെയ്തിട്ടുണ്ട്. നൂറിൽ ഏറെ കുപ്പികളിൽ സുജി തന്റെ കരവിരുത് തെളിയിച്ചിട്ടുണ്ട്. സുജി ചെയ്ത ബോട്ടിൽ ആർട്ടിനും കരകൗശല വസ്തുക്കൾക്കും ഇന്ന് ആവശ്യക്കാർ ഏറെയാണ്.