കൊണ്ടോട്ടി: കൊണ്ടോട്ടിയിലെ ഒരു സ്വകാര്യ പണമിടപാടു സ്ഥാ​പ​ന​ത്തിൽ മുക്കുപണ്ടം വ​ച്ച് കബളിപ്പിച്ച് പണം തട്ടിയ സംഭവത്തിൽ മൂ​ന്നു പേർ അ​റ​സ്റ്റി​ലാ​യി. പടിഞ്ഞാറ്റുംമുറി പടി​ഞ്ഞാറെകുണ്ട് സ്വ​ദേശി പടിക്കൽ മുനീർ(40), പുത്തൻവീട്ടിൽ കുട്ടൻ എന്ന അനൂപ് (30), കൊണ്ടോട്ടി നെടിയിരുപ്പ് സ്വദേശി വളപ്പിൽ യൂ​സ​ഫ്(32) എ​ന്നിവരെയാണ് പിടികൂടി​യത്. കൊണ്ടോട്ടിയിലെ സ്വകാര്യ പണമിടപാട് സ്ഥാപ​ന​ത്തിലെത്തിയ പ്രതികൾ ടൗണിലെ ഒരു ബാങ്കിൽ സ്വർണമാല പണയം വച്ചിട്ടുണ്ടന്നും അതു എടുത്ത് വിൽക്കാൻ സഹായിക്ക​ണ​മെന്നും പറഞ്ഞു സമീപിക്കുകയായിരുന്നു. തു​ടർന്നു സ്ഥാപനത്തിലെ ജീവനക്കാരെയും കൂട്ടി ബാങ്കിലെത്തിയ പ്രതികൾ അവരെ പുറത്തു നിറുത്തി പണം വാങ്ങി ബാങ്കിൽ പോയി തിരികെ വന്നു മുക്കുപണ്ടം നൽകി. ബാക്കി പണം ഓഫീസിൽ നിന്നു നൽകിയാൽ മ​തി​യെന്ന് പറഞ്ഞു പണവുമായി മുങ്ങി. ഇവർ പിന്നീട് ബാക്കി പ​ണ​ത്തിനു വരാതിരുന്നതിനെ തുടർന്ന് മാല പരിശോധി​ച്ച​പ്പോഴാണ് മുക്കുപണ്ട​മാ​ണെ​ന്നു ബോദ്ധ്യമാ​യത്. തു​ടർന്നു കൊണ്ടോട്ടി പൊലീസിൽ പരാതി നൽകിയതിനെ തുടർന്ന് നടത്തിയ അന്വേഷണത്തിലാണ് പ്രതികൾ പിടിയിലാ​യത്.
പിടിയിലായ മുനീറിന്റെ പേരിൽ മുക്കുപണ്ടം പണയം വച്ച് തട്ടിപ്പു നടത്തി​യ​തിനു മലപ്പുറം, മഞ്ചേരി, പൊന്നാനി, ചാവക്കാട്, പെ​രിന്തൽമണ്ണ സ്റ്റേഷനുകളിലാ​യി പത്തു കേ​സുകളുണ്ട്. നിലവിൽ മലപ്പുറം സ്റ്റേഷനിലെ ഒരു കേസുമായി ബന്ധപ്പെട്ട് ഒളിവിൽ കഴിയുന്നതിനിടയിലാണ് പുതിയ തട്ടിപ്പു നടത്തിയത്. അനൂപിനും യൂസഫിനും സമാന തട്ടിപ്പു നടത്തിയതിന് മലപ്പുറത്തും ചാവക്കാടും കേ​സുകളുണ്ട്. കൂട്ടു പ്രതി​ക​ളെക്കുറിച്ച് വ്യക്തമായ സൂചന ലഭിച്ചിട്ടുണ്ട്. ഇവർക്കായുള്ള അന്വേഷണം ഊർജ്ജിതമാക്കി. കൊണ്ടോട്ടി ഇൻസ്പ​ക്ടർ കെ.എം ബി​ജു,
എ​സ്‌.ഐ വിനോദ് വലിയാറ്റൂർ എന്നിവരുടെ നേതൃത്വത്തിൽ പ്രത്യേക അന്വേഷണ സംഘാംഗങ്ങളായ അബ്ദുൾ അസീസ്, സത്യനാഥൻ മനാട്ട്, ശശി കുണ്ടറക്കാട്, ഉണ്ണികൃഷ്ണൻ മാരാത്ത്, പി. സഞ്​ജീവ്, മോഹൻദാസ് എന്നിവരാണ് പ്രതികളെ പിടികൂ​ടി​യത്.