മലയിൻകീഴ്: മാറനല്ലൂർ ഗ്രാമപഞ്ചായത്തിലെ അരുവിക്കര, മാറനല്ലൂർ എന്നീ വാർഡുകളിൽ മത്സരിക്കുന്ന സഹോദരങ്ങളായ എൻ. സുനിൽകുമാറും, എൻ. ഷിബുവും ശ്രദ്ധേയരാകുന്നു. യൂത്ത് കോൺഗ്രസ് മുൻ മാറനല്ലൂർ മണ്ഡലം പ്രസിഡന്റ് സുനിൽകുമാറിന് ഇക്കുറി പാർട്ടി സീറ്റ് നിഷേധിച്ചതിൽ പ്രതിഷേധിച്ചാണ് സ്വതന്ത്ര സ്ഥാനാർത്ഥിയായത്. ബി.ജെ.പിയുടെ സജീവ പ്രവർത്തകനും ഒ.രാജഗോപാൽ.എം.എൽ.എയുടെ ഡ്രൈവറുമായ ഷിബു ആദ്യമായിട്ടാണ് മത്സരിക്കുന്നത്. അരുവിക്കര ആർ.വി ഭവനിൽ നാണുക്കുട്ടന്റെയും,വസുന്ധരയുടെയും മക്കളാണ് ഇവർ. സംവരണ വാർഡായ മാറനല്ലൂരിൽ വിജയം ഉറപ്പെന്നാണ് സുനിൽകുമാർ അവകാശപ്പെടുന്നത്. സുനിൽകുമാറിന്റെ സഹോദരൻ എൻ.ഷിബു ജനറൽ സീറ്റായ അരുവിക്കര വാർഡിൽ ബി.ജെ.പി സീറ്റ് നൽകിയത് വിജയ പ്രതീക്ഷയിലാണ്. കഴിഞ്ഞ തവണ ഇവിടെ ബി.ജെ.പിയാണ് വിജയിച്ചിരുന്നത്. മാറനല്ലൂർ വാർഡിൽ കോൺഗ്രസിനായിരുന്നു വിജയം. വീട്ടിലെത്തിയാൽ ഇരുവരും രാഷ്ട്രീയം പറയാറില്ലത്രേ.