തളിപ്പറമ്പ്: മലബാറിന്റെ സ്വപ്നങ്ങൾക്ക് ചിറകുവിരിച്ച് കുറ്റ്യേരി ഗ്രാമം ടൂറിസം കേന്ദ്രമാകുന്നു. മലനാട് മലബാർ റിവർ ക്രൂസ് ടൂറിസം പദ്ധതിയുടെ ഭാഗമായി ഉത്തരവാദിത്വ ടൂറിസം പദ്ധതിയിലൂടെയാണ് യാഥാർത്ഥ്യമാകുക. വിദേശ സഞ്ചാരികളെ വരവേറ്റ് നാടിന്റെ കാഴ്ച വിസ്മയങ്ങൾ ആസ്വദിപ്പിക്കുന്നതോടൊപ്പം കുറ്റ്യേരിയിലെയും സമീപ ഗ്രാമങ്ങളിലെയും തൊഴിൽ മേഖലയും ഉത്തേജിപ്പിക്കുകയാണ് ലക്ഷ്യം.
ഇതിനായി 'സെവൻ വിംഗ്സ് ഹോളിഡേയ്സ് & റിസോർട്ട് കമ്പനി രൂപീകരിച്ച് പ്രവർത്തനം തുടങ്ങി. മലനാട് മലബാർ റിവർ ക്രൂസ് ടൂറിസം പദ്ധതിയുടെ ഭാഗമായി കുപ്പം പുഴയിൽ വാട്ടർ സ്‌പോർട്സ്, കയാക്കിംഗ്, സിപ് ലൈൻ റിവർ ക്രോസിംഗ്, തുടങ്ങിയ സാഹസിക വിനോദ സഞ്ചാര സംവിധാനങ്ങൾ ഒരുക്കുന്നതിനും ലക്ഷ്യമിടുന്നുണ്ടെന്ന് സെവൻ വിംഗ്സ് ഹോളിഡെയ്സ് & റിസോർട്സ് ചെയർമാൻ പി.വി. വത്സരാജൻ പറഞ്ഞു.
വിനോദ സഞ്ചാര വകുപ്പിന്റെയും തദ്ദേശ സ്വയംഭരണ സ്ഥാപനങ്ങളുടെയും സഹകരണ സ്ഥാപനങ്ങളുടെയും സഹകരണത്തോടെയാണ് ഇവിടെ ഉത്തരവാദിത്വ ടൂറിസം പ്രവർത്തനത്തിലൂന്നിയുള്ള പദ്ധതി നടപ്പിലാക്കുന്നത്. രാജ്യത്തെ ഏറ്റവും മനോഹരമായ കണ്ടൽക്കോട്ടകൾക്ക് അതിരിലൂടെ ജലവീഥികളിലൂടെയുള്ള ഉല്ലാസ ജലയാത്ര, അതിനായെത്തുന്ന വിനോദസഞ്ചാരികൾക്ക് കുറഞ്ഞ ചിലവിൽ താമസസൗകര്യം, ആദ്യഘട്ടത്തിൽ ഹോം സ്റ്റേ, തുടർന്ന് റിസോർട്ട്, ഹോട്ടൽ എന്നിവയൊരുക്കുക ഈ പദ്ധതിയുടെ ഭാഗമാണ്.
കുറ്റ്യേരി കേന്ദ്രീകരിച്ചുള്ള ഉത്തരവാദിത്വ ഗ്രാമം പദ്ധതിയിൽ സമീപ ഗ്രാമങ്ങളായ ഏഴോം, പരിയാരം, പട്ടുവം, ചപ്പാരപ്പടവ് എന്നിവയും ഉൾപ്പെടും. ഏഴോം കൈപ്പാട് അരിയും, പുഴമീൻ കറിയുമുൾപ്പെടുന്ന തനത് ഭക്ഷണ വൈവിദ്ധ്യം പരിചയപ്പെടുത്തുക, മത്സ്യബന്ധനവും കരകൗശല നിർമ്മാണവും കള്ള് ചെത്തും കുടുംബശ്രീ കുടിൽ വ്യവസായമുൾപ്പെടെയുള്ള വിവിധ മേഖലകളെ പരിചയപ്പെടുത്തുകയും പരമ്പരാഗത തൊഴിൽ മേഖലകളെ അവയിലൂടെ പ്രോത്സാഹിപ്പിക്കുകയും ചെയ്യുക, ചൂണ്ടയിട്ട് മീൻപിടിക്കുന്നതിന് അവസരമൊരുക്കി തത്സമയം അത് പാചകം ചെയ്ത് സഞ്ചാരികൾക്ക് നൽകുക, നെൽ വയലേലകൾക്കിടയിലൂടെ നടന്ന് നീങ്ങുന്ന നവ്യാനുഭൂതി നുകരുന്നതിന് അവസരമൊരുക്കുക തുടങ്ങിയ ഉത്തരവാദിത്വ ടൂറിസം പ്രവർത്തനങ്ങളൊക്കെ ഈ ഗ്രാമത്തിന്റെ ഭാഗമാവും.