തിരുവനന്തപുരം: അമേരിക്കയിലെ സ്റ്റാൻഫോർഡ് സർവകലാശാലയുടെ റൈസിംഗ് സ്റ്റാർസ് പട്ടികയിൽ ഇടം നേടി കാലടി ശ്രീശങ്കര കോളേജ് കെമിസ്ട്രി വിഭാഗം അദ്ധ്യാപിക ഡോ. ശ്രീകല എം.എസ്.

2019ൽ ലോകത്തിന് ഏറ്റവും കൂടുതൽ സംഭാവനകൾ നൽകിയ ശാസ്ത്രജ്ഞരിൽ നിന്ന് തിരഞ്ഞെടുത്ത ഏറ്റവും മികച്ച രണ്ട് ശതമാനം ആളുകളുടെ പട്ടികയാണ് 'റൈസിംഗ് സ്റ്റാർസ്'. സ്റ്റാർച്ച് പോലുളള പ്രകൃതിദത്തവസ്തുക്കളിൽ നിന്നും പരിസ്ഥിതിസൗഹൃദമായ മികച്ച ഉത്പന്നങ്ങൾ ഉണ്ടാക്കുന്നതിനുളള സാങ്കേതികവിദ്യ വികസിപ്പിച്ചതിനാണ് ഡോ. ശ്രീകല നേട്ടം സ്വന്തമാക്കിയത്.

ജർമ്മൻ ഗവൺമെന്റിന്റെ അലക്സാണ്ടർ വോൺ ഹുബോൾട്ട് പോസ്റ്റ് ഡോക്ടറൽ ഫെലോഷിപ്പിനും, ജപ്പാൻ ഗവൺമെന്റിന്റെ ജെ.എസ്.പി.എസ് പോസ്റ്റ് ഡോക്ടറൽ ഫെലോഷിപ്പിനും അർഹയായിട്ടുണ്ട്. 50-ൽപരം രാജ്യാന്തര ജേർണലുകളിൽ ഗവേഷണ പ്രബന്ധങ്ങൾ പ്രസിദ്ധീകരിച്ചു.

2019 ൽ ജപ്പാൻ ഗവൺമെന്റിന്റെ ക്ഷണമനുസരിച്ച് വകയാമയിൽ നടന്ന 'ഫ്യൂച്ചർ ജനറേഷൻ സിമ്പോസിയത്തിൽ' പ്രബന്ധം അവതരിപ്പിച്ചു. കോട്ടയം പാമ്പാടി ശ്രീഭവനിൽ പരേതനായ പി.ഐ. സദാശിവന്റെയും പി.കെ. സുമതിയുടെയും മകളും ആലുവ ആസാദ് റോഡ് പൗർണമിയിൽ ശ്രീകുമാർ പി.ആർ ന്റെ ഭാര്യയുമാണ്.