തിരുവനന്തപുരം: കനത്ത മഞ്ഞിലും തണുപ്പിലും രാജ്യത്തെ കർഷകർ ദിവസങ്ങളായി നടത്തിവരുന്ന പ്രക്ഷോഭം കണ്ടില്ലെന്നു നടിക്കുന്ന മോദി ഭരണകൂടം തീക്കളിയാണ് നടത്തുന്നതെന്ന് കോൺഗ്രസ് പ്രവർത്തക സമിതിയംഗം ഉമ്മൻ ചാണ്ടി. പഞ്ചാബ്, ഹരിയാന എന്നിവിടങ്ങളിൽ നിന്നുള്ള കർഷകർക്കു പുറമെ മറ്റ് സംസ്ഥാനങ്ങളിൽ നിന്നുള്ള കർഷകർകൂടി എത്തുന്നതോടെ 'ഡൽഹി ചലോ മാർച്ച്' കർഷകസാഗരമായി മാറും. കർഷകരുടെ രക്ഷയ്ക്കുവേണ്ടിയാണ് കേന്ദ്രസർക്കാർ കാർഷിക നിയമം കൊണ്ടുവന്നത് എന്ന് പ്രധാനമന്ത്രി മൻ കീ ബാത്തിൽ ആവർത്തിച്ചു. അതു കർഷകർക്കു ബോധ്യപ്പെടേണ്ടേ? പാർലമെന്റ് പാസാക്കിയ 3 കർഷക നിയമങ്ങൾ കർഷകതാത്പര്യങ്ങൾ ഹനിക്കുന്നതാണെന്ന് കർഷകർ വിശ്വസിക്കുന്നു. കർഷകവിരോധമാണ് ഈ സർക്കാരിന്റെ മുഖമുദ്രയെന്ന് ഉമ്മൻ ചാണ്ടി പറഞ്ഞു.