ചേർത്തല:നടവഴിയിൽ മരംവീണ് ദിവസങ്ങൾ കഴിഞ്ഞിട്ടും വെട്ടിമാ​റ്റാത്തതിനെതിരെ പരാതിയുമായി നാട്ടുകാർ. വീണുകിടക്കുന്ന മരത്തിനടിയിൽകൂടി കടന്നുപോകേണ്ട ഗതികേടിലാണ് ഇപ്പോൾ നാട്ടുകാർ. ചേർത്തല നഗരസഭ 15–ാം വാർഡിൽ ചക്കരക്കുളം ഗവ.യുപി സ്‌കൂളിന്റെ പടിഞ്ഞാറുഭാഗത്തു നിന്നിരുന്ന തണൽ മരമാണ് കഴിഞ്ഞ 17ന് വൈകിട്ട് കാ​റ്റിൽ കടപുഴകി നടവഴിക്ക് കുറുകെ വീണത്. മരംവീണതിനെത്തുടർന്ന് സമീപത്തെ വീടുകൾക്കും കേടുപാട് സംഭവിച്ചിരുന്നു.

15 ഓളം കുടുംബങ്ങൾ കടന്നുപോകുന്ന നടവഴിയിലൂടെ ഇപ്പോൾ യാത്രചെയ്യാൻ കഴിയാത്ത സ്ഥിതിയാണ്. നാട്ടുകാർ വില്ലേജ് ഓഫിസിലും നഗരസഭയിലും താലൂക്ക് ഓഫിസും വിവരം അറിയിച്ചെങ്കിലും മരംവെട്ടിമാ​റ്റാൻ തയ്യാറാകുന്നില്ലെന്നാണ് ആരോപണം.