ആലപ്പുഴ: തദ്ദേശസ്വയംഭരണ സ്ഥാപനങ്ങളിലേക്ക് ഇന്ന് നടക്കുന്ന ആദ്യഘട്ട പോളിംഗിൽ ജില്ലയിലെ രാഷ്ട്രീയ- സാമൂഹിക രംഗങ്ങളിലെ പ്രമുഖർ വോട്ടു രേഖപ്പെടുത്താനെത്തും. ഭരണപരിഷ്കാര കമ്മിഷൻ അദ്ധ്യക്ഷൻ വി.എസ്.അച്യുതാനന്ദന് പറവൂർ ഗവ.എച്ച്.എസിലാണ് വോട്ടെങ്കിലും തിരുവനന്തപുരത്തു നിന്ന് എത്താനുള്ള ബുദ്ധിമുട്ട് കാരണം അദ്ദേഹം തപാൽ വോട്ടിന് അപേക്ഷിച്ചിട്ടുണ്ട്.

 മന്ത്രി ജി.സുധാകരൻ

കളർകോട് ചിന്മയ സ്കൂളിലെ ബൂത്തിൽ ഉച്ചയ്ക്ക് ഒന്നിനും 1.30 നും ഇടയിൽ ഭാര്യ ജൂബിലി നവപ്രഭയ്ക്കൊപ്പമെത്തി വോട്ട് രേഖപ്പെടുത്തും.

 മന്ത്രി തോമസ് ഐസക്

എസ്.ഡി.വി ബോയ്സ് എച്ച്.എസിൽ രാവിലെ 10 ന് വോട്ട് ചെയ്യും.

 മന്ത്രി പി.തിലോത്തമൻ

ചേർത്തല തെക്ക് പഞ്ചായത്ത് വി.വി ഗ്രാമം ഐ.ടി.സി ബൂത്തിൽ രാവിലെ 8ന് വോട്ടു ചെയ്യും.

 വെള്ളാപ്പള്ളി നടേശൻ

എസ്.എൻ.ഡി.പി യോഗം ജനറൽ സെക്രട്ടറി വെള്ളാപ്പള്ളി നടേശന് കണിച്ചുകുളങ്ങര ദേവസ്വം ഗേൾസ് ഹൈസ്കൂളിലാണ് വോട്ട്. ഉച്ചയ്ക്ക് രണ്ടിന് ഭാര്യ പ്രീതി നടേശനും മകനും ബി.ഡി.ജെ.എസ് അദ്ധ്യനുമായ തുഷാർ വെള്ളാപ്പള്ളിക്കും ഒപ്പമാവും വോട്ട് ചെയ്യാനെത്തുന്നത്.

 രമേശ് ചെന്നിത്തല

ചെന്നിത്തല തൃപ്പെരുന്തുറ ഗവ.എൽ.പി.എസിലെ ഒന്നാം നമ്പർ ബൂത്തിലാണ് വോട്ട്. രാവിലെ 8ന് ഭാര്യ അനിത രമേശ്, മൂത്തമകൻ ഡോ.രോഹിത്ത് എന്നിവർക്കൊപ്പമെത്തും. ഇളയ മകൻ രമിത്ത് രമേശ് ഐ.ആർ.എസ് പരിശീലനത്തിലാണ്

 കെ.സി.വേണുഗോപാൽ എം.പി

ആലപ്പുഴ കണിയാകുളം എൻ.എസ്.എസ് ഹാളിലാണ് വോട്ട്. രാവിലെ 8 ന് വോട്ട് രേഖപ്പെടുത്തും.

 കെ.ആർ. ഗൗരിഅമ്മ

ആലപ്പുഴ പോളഭാഗം ജെ.ബി.എസിലാണ് വോട്ടെങ്കിലും ശാരീരിക ബുദ്ധിമുട്ടും കൊവിഡും കണക്കിലെടുത്ത് വോട്ട് ചെയ്യേണ്ട എന്ന തീരുമാനത്തിലാണ്. എങ്കിലും ഇന്ന് രാവിലെ തീരുമാനം മാറ്റിയാൽ വോട്ട് ചെയ്യും.

 എ.എം.ആരിഫ് എം.പി

കുതിരപ്പന്തി മാധവ മെമ്മോറിയൽ സ്കൂളിലാണ് വോട്ട്. രാവിലെ 8 ന് ഭാര്യ ഡോ.ഷഹനാസ്,മകൻ സൽമാൻ മകൾ റിസ്വാന എന്നിവർക്കൊപ്പമെത്തി വോട്ട് ചെയ്യും.

 സംവിധായകൻ ഫാസിൽ

ആലപ്പുഴ ലിയോതേർട്ടീന്ത് എൽ.പി.എസിലാണ് വോട്ട്. രാവിലെ 11.30ഒാടെ ഇളയമകൻ ഫർഹാൻ ഫാസിലിനോടൊപ്പമെത്തും. എരുമേലിയിൽ ഷൂട്ടിംഗ് ലൊക്കേഷനിൽ ആയതിനാൽ ഫഹദ് ഫാസിൽ വോട്ട് ചെയ്യില്ല.

 ഷാനിമോൾ ഉസ്മാൻ എം.എൽ.എ

കൊവിഡ് പോസിറ്റീവ് ആയതിനാൽ പോസ്റ്റൽ വോട്ട് ചെയ്തു.

 പ്രതിഭ ഹരി എം.എൽ.എ

തകഴി കാർമ്മൽ കോൺവെന്റ് സ്കൂളിലാണ് വോട്ട്. രാവിലെ 8 ന് വോട്ട് ചെയ്യാനെത്തും.

 വയലാർ രവി എം.പി

വയലാർ പണിക്കവീട്ടിൽ സെന്റ് സെബാസ്റ്റ്യൻസ് പബ്ളിക് സ്കൂളിലെ ഒന്നാം നമ്പർ ബൂത്തിൽ ഉച്ചയോടെ വോട്ടു ചെയ്യും.