ആലപ്പുഴ: നേരത്തെ അറിയിച്ചിരുന്ന സമയത്തിന് മുമ്പേ പോളിംഗ് ബൂത്തിലെത്തി വോട്ടുചെയ്ത ധനമന്ത്രി തോമസ് ഐസക്ക് മാദ്ധ്യമങ്ങൾക്ക് മുഖം കൊടുക്കാതെ കടന്നു. ഇന്നലെ രാവിലെ 10 ന് എസ്.ഡി.വി ബോയ്സ് എച്ച്.എസ്.എസിലെ ബൂത്തിൽ വോട്ട് ചെയ്യുമെന്നാണ് മന്ത്രിയുടെ ഓഫീസിൽ നിന്ന് അറിയിച്ചിരുന്നത്.

എന്നാൽ തിരുവനന്തപുരത്ത് നിന്ന് വന്ന അദ്ദേഹം 9ന് ബൂത്തിലെത്തി വോട്ട് രേഖപ്പെടുത്തിയശേഷം ഉടൻ തന്നെ കാറിൽ എറണാകുളത്തേക്ക് പോവുകയും ചെയ്തു.

മന്ത്രിയുടെ ഓഫീസ് സ്ഥിതി ചെയ്യുന്നത് പോളിംഗ് ബൂത്ത് നിൽക്കുന്ന വാർഡിലല്ലെന്ന് യു.ഡി.എഫ് പോളിംഗ് ഏജന്റ് ആക്ഷേപം ഉന്നയിച്ചു. എന്നാൽ വോട്ടേഴ്സ് ലിസ്റ്റിൽ പേരുള്ള സ്ഥിതിക്ക് തനിക്ക് വോട്ടവകാശമുണ്ടെന്ന് മന്ത്രി ചൂണ്ടിക്കാട്ടിയതോടെ പോളിംഗ് ഏജന്റ് തർക്കത്തിൽ നിന്ന് പിൻവാങ്ങി. പോളിംഗ് ട്രെൻഡ് വച്ച് മാത്രം തിരഞ്ഞെടുപ്പ് ഫലം പ്രവചിക്കുന്ന കാലം മാറിയെന്നും, ആകെയുള്ള ട്രെൻഡ് ഇടതുപക്ഷത്തിന് അനുകൂലമാണെന്നും തോമസ് ഐസക്ക് പിന്നീട് 'കേരളകൗമുദി'യോട് പറഞ്ഞു.