പുകപരിശോധന കേന്ദ്രങ്ങൾ ഓൺലൈൻ ശൃംഖലയിൽ
ആലപ്പുഴ: ജില്ലയിലെ പുകപരിശോധന കേന്ദ്രങ്ങൾ മുഴുവൻ ഈ മാസം അവസാനത്തോടെ, മോട്ടോർ വാഹന വകുപ്പിന്റെ 'എം പരിവാഹൻ' സൈറ്റുമായി ഓൺലൈൻ ബന്ധത്തിലാവും. ചേർത്തല ആർ.ടി ഓഫീസ് പരിധിയിലുള്ള പുകപരിശോധന കേന്ദ്രങ്ങൾ നവംബർ ആദ്യവാരം തന്നെ ഒാൺലൈനിൽ എത്തിയിരുന്നു. നവംബർ 30ഓടെ എല്ലാ പരിശോധന കേന്ദ്രങ്ങളും ഒാൺലൈൻ ആകണമെന്ന മോട്ടോർ വാഹന വകുപ്പിന്റെ നിർദ്ദേശ പൂർണമായി നടപ്പാകാതിരുന്നതിനാലാണ് ഈ മാസംകൂടി സാവകാശം നൽകിയത്.
നിലവിൽ ജില്ലയിലെ 60 ശതമാനത്തോളം പുക പരിശോധന കേന്ദ്രങ്ങളും ഓൺലൈനിലായിട്ടുണ്ട്. ഇതോടെ പുകപരിശോധന യന്ത്രങ്ങളിൽ നിന്നുള്ള ഫലം വെബ്‌സൈറ്റിലേക്കാണ് എത്തുന്നത്. പരിശോധനാഫലത്തിൽ തിരുത്തലുകൾക്കും ക്രമക്കേടുകൾക്കും അവസരം ലഭിക്കില്ല. കഴിഞ്ഞ രണ്ടാഴ്ചയ്ക്കിടെ ജില്ലയിൽ 20ൽ അധികം വാഹനങ്ങൾ പുക പരിശോധനയിൽ പരാജയപ്പെട്ടു. പുകശല്യമില്ലെങ്കിൽ മാത്രമേ വാഹൻ സൈറ്റിൽ പുകപരിശോധന സർട്ടിഫിക്കറ്റ് ചേർക്കപ്പെടുകയുള്ളൂ.
2017 ഏപ്രിൽ ഒന്നിനു ശേഷമുള്ള വാഹനങ്ങളുടെ പുക സർട്ടിഫിക്കറ്റിന്റെ കാലാവധി ഒരു വർഷമാണ്. ജനുവരി ഒന്നിന് ശേഷം പുകപരിശോധന കേന്ദ്രങ്ങൾ ഓൺലൈൻ സംവിധാനത്തിലായില്ലെങ്കിൽ ലൈസൻസ് റദ്ദ് ചെയ്യും. അന്തരീക്ഷ മലിനീകരണത്തോത് ഏറെയുള്ള ഡീസൽ വാഹനങ്ങളാണ് പുതിയ സമ്പ്രദായത്തിലെ പുക പരിശോധനയിൽ പരാജയപ്പെടുന്നതിൽ ഏറെയും. പുക സർട്ടിഫിക്കറ്റും ഡിജിറ്റൽ ഡോക്യുമെന്റായായതോടെ വാഹന ഉടമകൾക്ക് പരിശോധന സമയത്ത് എം പരിവാഹൻ സൈറ്റിലൂടെ മുഴുവൻ രേഖകളും ഉദ്യോഗസ്ഥരെ കാണിക്കാനാവും.
എം പരിവാഹൻ മൊബൈൽ ആപ്പിലാണ് രേഖകൾ ശേഖരിക്കപ്പെടുന്നത്
പരിവാഹൻ സൈറ്റിൽ വാഹന നമ്പർ അടിച്ച് പ്രവേശിക്കണം
തുടർന്ന് ഉടമയുടെ ഫോൺ നമ്പർ നൽകിയാൽ രജിസ്‌ട്രേഷൻ വിവരങ്ങൾക്കൊപ്പം പുകപരിശോധന ഫലവും ചേർക്കപ്പെടും
കണ്ടെത്താം, ഓൺലൈനിൽ
പുക സർട്ടിഫിക്കറ്റ് ഇല്ലാത്ത വാഹനങ്ങൾ ഉദ്യോഗസ്ഥർക്ക് ഓൺലൈനിലൂടെ കണ്ടെത്താം. വാഹനത്തിന്റെ രജിസ്‌ട്രേഷൻ നമ്പർ ഉപയോഗിച്ചുള്ള പരിശോധനയിൽ ഈ വിവരങ്ങൾ ലഭിക്കും. പരിശോധനാഫലം മാത്രമാണ് ഇപ്പോൾ 'വാഹനി'ൽ ശേഖരിക്കുന്നത്. രണ്ടാംഘട്ടത്തിൽ പരിശോധനയുടെ നിലവാരവും ഉറപ്പുവരുത്തും. പുക പരിശോധനകേന്ദ്രങ്ങളിലെ യന്ത്രസംവിധാനങ്ങളുടെയും സോഫ്‌റ്റ് വെയറിന്റെയും നിലവാരം വിലയിരുത്തും. ഇതോടെ ക്രമക്കേടിനുള്ള അവസരം പൂർണമായും അടയും. വാഹന രജിസ്‌ട്രേഷൻ രേഖകൾക്കൊപ്പം ഇൻഷ്വറൻസ് പോളിസി വിവരങ്ങൾ കൂട്ടിച്ചേർത്തതോടെ വ്യാജ സർട്ടിഫിക്കറ്റുകളുടെ ഉപയോഗം തടയാൻ കഴിഞ്ഞിരുന്നു.
പരിശോധന നിരക്ക്
പെട്രോൾ വാഹനങ്ങൾ
ടു വീലർ........60
ത്രീവീലർ......80
ഫോർ വീലർ....100
ഡീസൽ വാഹനങ്ങൾ
ടു വീലർ........80
ത്രീവീലർ......90
ഫോർ വീലർ....110
ഹെവി വെഹിക്കിൾ.....150
ഓൺലൈൻ സംവിധാനത്തിലൂടെയാണ് കഴിഞ്ഞ മാസം മുതൽ പുക പരിശോധന നടത്തുന്നത്. എം പരിവാഹനിൽ വണ്ടി നമ്പരും വാഹന ഉടമയുടെ മൊബൈൽ നമ്പരും എന്റർ ചെയ്ത് പരിശോധന വിവരങ്ങൾ അപ് ലോഡ് ചെയ്താൽ മതി
(ഗീത,പുകപരിശോധന കേന്ദ്രം കഞ്ഞിക്കുഴി)