നിർമ്മാണം വി​വി​ധ കേന്ദ്രങ്ങളി​ൽ

ആലപ്പുഴ: ജി​ല്ലയി​ൽ തീരത്ത് പുലി​മുട്ടുകൾ ഒരുക്കുന്നതി​നുള്ള ടെട്രാ പോഡുകളുടെ നി​ർമാണം ദ്രുതഗതി​യി​ൽ പുരോഗമി​ക്കുന്നു. കരി​ങ്കല്ലുപയോഗി​ച്ചുള്ള പുലി​മുട്ടുകൾക്ക് പകരം ടെട്രാ പോഡ് നി​രത്തി​യാണ് ജലസേചന വകുപ്പ് പുലി​മുട്ടുകൾ നി​ർമി​ക്കുക. അടുത്ത കാലവർഷത്തിന് മുമ്പ് 50ശതമാനം പുലിമുട്ട് നിർമ്മാണം പൂർത്തീകരിക്കാനുള്ള പ്രവർത്തനം ശക്തമാക്കി.

ആദ്യഘട്ടത്തിൽ ആലപ്പുഴ, അമ്പലപ്പുഴ, ഹരിപ്പാട് നിയമസഭ മണ്ഡലങ്ങളിൽ അതിരൂക്ഷമായ കടലാക്രമണം അനുഭവപ്പെടുന്ന 13.30 കിലോമീറ്റർ നീളത്തിൽ 114 പുലിമുട്ടുകൾ നിർമ്മിക്കുന്നതിന് 184.04 കോടി കിഫ്ബിയിൽ നിന്നു അനുവദിച്ചു. നിർമ്മാണ ചുമതല കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്റ് കോർപറേഷനാണ്. 18മാസം കൊണ്ട് നിർമ്മാണം പൂർത്തീകരിക്കാൻ ലക്ഷ്യമിട്ട പദ്ധതി ഒക്ടോബർ ആദ്യവാരം കാട്ടൂരിൽ മന്ത്രി ഡോ.തോമസ് ഐസക് നിർമ്മാണോദ്ഘാടനം നിർവഹിച്ചു. അമ്പലപ്പുഴ, കാട്ടൂർ, പുന്നപ്ര എന്നിവി​ടങ്ങളിലാണ് ടെട്രാ പോഡ് നിർമ്മാണം ആംഭിച്ചത്. ചെറിയ തോതിലുള്ള നിർമ്മാണം വേഗത്തിലാക്കാൻ അമ്പലപ്പുഴയിൽ കോൺക്രീറ്റ് മിക്സിംഗ് പ്ളാന്റ് സ്ഥാപിച്ചു. അടുത്താഴ്ച മിക്സിംഗ് പ്ളാന്റിൽ നിന്ന് റെഡിമിക്സ് വാഹനത്തിൽ നിർമ്മാണ കേന്ദ്രങ്ങളിൽ എത്തിക്കും. ഓരോ കേന്ദ്രത്തിലും തയ്യാറാക്കിയിട്ടുള്ള മോൾഡിൽ കോൺക്രീറ്റ് നിറച്ച് നിർമ്മാണം വേഗത്തിലാക്കും. വർഷങ്ങളായി രൂക്ഷമായ കടലാക്രമണം അനുഭവപ്പെടുന്ന പ്രദേശങ്ങളാണ് പുലിമുട്ടുകളുടെ നിർമ്മാണത്തിന് ആദ്യഘട്ടത്തിൽ തിരഞ്ഞെടുത്തത്. ടെട്രാ പോഡിന്റെ തൂക്കം തിട്ടപ്പെടുത്താൻ കാട്ടൂരിൽ വേബ്രിഡ്ജ് നിർമ്മാണവും പൂർത്തിയായി.

#കരിങ്കല്ല് ക്ഷാമം പരിഹരിച്ചു

പുലിമുട്ടുകളുടെ അടിഭാഗത്ത് നിരത്തുന്നതിനുള്ള കരിങ്കല്ലിന്റെ ക്ഷാമം പരിഹരിക്കാൻ നടപടിയായി. മണിമലയിൽ 17ഏക്കർപാറമട വിലയ്ക്കെടുത്ത് പാറ പൊട്ടിക്കൽ ജോലികൾ ആരംഭിച്ചു. കല്ലിന് മുകളിൽ രണ്ട് ടൺ തൂക്കം വരുന്ന ചെറിയ ടെട്രാപോഡ് നാല് വശവും അടുക്കും. 100 മുതൽ 1000 കിലോ വരെയുള്ള ചെറുകല്ല് നെറ്റ് വിരിച്ച് ഉള്ളിൽ നിറയ്ക്കും. മുകൾഭാഗത്ത് അഞ്ച് ടൺ ഭാരമുള്ള രണ്ട് പാളി ടെട്രാപോഡ് അടുക്കും. കരയിൽ നിന്ന് 20 മുതൽ 40 വരെ മീറ്റർ നീളത്തിൽ നിർമ്മിക്കുന്ന പുലി​മുട്ടുകൾക്ക് അടിഭാഗത്ത് 20 മുതൽ 32 മീറ്റർ വരെ വീതിയും മുകളിൽ അഞ്ചു മുതൽ ആറു മീറ്റർ വരെ വീതിയോടെ ജലനിരപ്പിൽ നിന്ന് നാലു മീറ്റർ വരെ ഉയരം ഉണ്ടാകും.

പുലിമുട്ട് നിർമ്മിക്കുന്ന പ്രദേശങ്ങൾ

# ആരംഭിച്ചത്

കാട്ടൂർ മുതൽ ഓമനപ്പുഴ വരെ, കാക്കാഴം മുതൽപുന്നപ്ര വരെ,

# ആരംഭിക്കാനുള്ളത്

പതിയാങ്കര, ആറാട്ടുപുഴ, വട്ടച്ചാൽ

...............................

പദ്ധതി 18മാസം കൊണ്ട് പൂർത്തീകരിക്കാനാണ് തീരുമാനം. കടലാക്രമണത്തിന്റെ ശക്തി കണക്കിലെടുത്ത് അടുത്ത കാലവർഷത്തിന് മുമ്പ് അൻപത് ശതമാനം നിർമ്മാണം പൂർത്തീകരിക്കും. ടെട്രാ പോഡ് നിർമ്മിക്കാനുള്ള പ്ളാനും വേ ബ്രിഡ് ജിന്റെ നിർമ്മാണവും കല്ലിന്റെ ക്ഷാമവും പരിഹരിക്കാൻ കഴിഞ്ഞു.

കെ.പി.ഹരൻബാബു, ഡെപ്യൂട്ടി ജനറൽ മാനേജർ,

കേരള ഇറിഗേഷൻ ഇൻഫ്രാസ്ട്രക്ചർ ഡെവലപ്മെന്റ് കോർപറേഷൻ

ടെട്രാ പോഡ്