ആലപ്പുഴ: മട വീഴ്ചയുണ്ടായ കൈനകരി കനകാശേരി പാടശേഖരം ജില്ലാ കളക്ടർ എ.അലക്സാണ്ടർ സന്ദർശിച്ചു. കനകാശേരി പാടശേഖരത്തിലും സമീപത്തുള്ള മീനപ്പള്ളി, വലിയകരി പാടശേഖരങ്ങളിലും വെള്ളം കയറികിടക്കുകയാണ്. സമീപ പ്രദേശങ്ങളിലെ വീടുകളിൽ വെള്ളം കയറിയിട്ടുണ്ടെന്ന് സമീപവാസികൾ പരാതി അറിയിച്ചതോടെ വെള്ളം വറ്റിക്കാനുള്ള നടപടികൾ സ്വീകരിക്കാൻ ബന്ധപ്പെട്ട ഉദ്യോഗസ്ഥർക്ക് കളക്ടർ നിർദ്ദേശം നൽകി. കൃഷി, ഇറിഗേഷൻ, പുഞ്ച സ്പെഷ്യൽ ഓഫീസർമാരുടെ യോഗം ചേർന്ന് മട വീഴ്ചയുമായി ബന്ധപ്പെട്ട കൂടുതൽ നടപടികൾ ഉടൻ സ്വീകരിക്കും. ഇറിഗേഷൻ എക്സിക്യൂട്ടീവ് എൻ‌ജിനിയർ മോളിക്കുട്ടി, കുട്ടനാട് തഹസിൽദാർ വിജയസേനൻ തുടങ്ങിയവരും കളക്ടർക്കൊപ്പമുണ്ടായിരുന്നു.