ആലപ്പുഴ : നഗരത്തിൽ ജില്ലാക്കോടതിക്ക് എതിർവശം ആലപ്പുഴ പ്രസ് ക്ലബിലും സമീപത്തെ കടകളിലും മോഷണം നടന്നു. പ്രസ് ക്ലബിൽ നിന്ന് ഇലക്ട്രോണിക് ഉപകരണങ്ങളടക്കമുള്ളവ മോഷണം പോയി. ശനിയാഴ്ച രാവിലെയോടെയാണ് മോഷണ വിവരം പുറത്തറിഞ്ഞത്. കംപ്യൂട്ടറിന്റെ യു.പി.എസ്, മോണിറ്റർ, സ്കാനർ, ആംപ്ലിഫയർ, ബൾബുകൾ തുടങ്ങിയവയാണ് പ്രസ് ക്ലബിൽ നിന്ന് നഷ്ടമായത്. ഇൻവെർട്ടർ കടത്താനാകാതെ ഉപേക്ഷിച്ച നിലയിൽ കണ്ടെത്തി.
സമീപത്തെ സപ്ലൈകോയിൽ നിന്ന് ഇരുമ്പ് ഡെസ്ക്കുകളും ചാക്കുകളും നഷ്ടപ്പെട്ടു. വഴിയോര കച്ചവടക്കാർ സ്ഥാപിക്കുന്ന വലിയ കുടകളും കവർന്നു. മറ്റൊരിടത്ത് നിന്നും എടുത്തതിന് ശേഷം ഉപേക്ഷിച്ച മോണിട്ടർ പ്രസ് ക്ലബിന് സമീപത്തു നിന്ന് കണ്ടെടുത്തു. ക്ലബ് കെട്ടിടത്തിന്റെ നവീകരണം നടക്കുന്നതിനാൽ മൂന്നാം നിലയിലായിരുന്നു കംപ്യൂട്ടർ സൂക്ഷിച്ചിരുന്നത്. രാത്രി പ്രദേശത്ത് കണ്ടവരെ ചുറ്റിപ്പറ്റിയാണ് അന്വേഷണം. സി.സി. ടി.വി ദൃശ്യങ്ങൾ ശേഖരിച്ചിട്ടുണ്ട്. സംഭവത്തിൽ ആലപ്പുഴ നോർത്ത് പൊലീസ് കേസ് രജിസ്റ്റർ ചെയ്തു.