മുതുകുളം: സാമൂഹി​ക പ്രവർത്തന മേഖലയി​ലെ സജീവ പ്രവർത്തനത്തി​ന്റെ കരുത്തി​ലാണ് കണ്ടല്ലൂർ പഞ്ചായത്ത് പത്താം വാർഡിൽ നി​ന്നുള്ള സുജി.സിയുടെ വി​ജയം നേടി​യത്. യു.ഡി.എഫ് സ്ഥാനാർത്ഥി​യായി​ മത്സരി​ച്ച സുജി​ 352 വോട്ടിന്റെ ഭൂരി​പക്ഷത്തോടെ എൽ.ഡി​. എഫ് സി​റ്റിംഗ് സീറ്റ് പി​ടി​ച്ചെടുക്കുകയായി​രുന്നു.

1990ൽ സാക്ഷരതാമിഷനിലൂടെ സാമൂഹി​ക പ്രവർത്തനം തുടങ്ങി​യ സുജി, സാക്ഷരതാ യജ്ഞം ഇൻസ്‌പെക്ടർ ,പ്രേരക് , പത്താം ക്ലാസ് തുല്യതാ പരീക്ഷാ സെന്റർ കോ ഓഡിനേറ്റർ, എ .ഡി.എസ് - സി .ഡി .എസ് ഭാരവാഹി, കുടുംബശ്രീ ജെൻഡർ പ്രോഗ്രാം ജില്ലാ സെലക്ടഡ് ആർ. പി എന്നീ നിലകളിൽ പ്രവർത്തി​ച്ചു. കണ്ടല്ലൂർ 1410 ഫാർമേഴ്‌സ് സർവീസ് സഹകരണ ബാങ്കിന്റെ ഡയറക്ടർ ബോർഡിലേക്ക് ഏറ്റവും കൂടുതൽ ഭൂരിപക്ഷത്തിലാണ് തെരഞ്ഞെടുക്കപ്പെട്ടത് .2000-2005 കാലയളവിൽ സുജിയുടെ സഹോദരി അജിതാഭാസ്കരൻ ഈ വാർഡിനെ പ്രതിനിധീകരിച്ചിരുന്നു. കഴിഞ്ഞ തവണ ഇടതുപക്ഷം പിടിച്ചെടുത്ത വാർഡായി​രുന്നു ഇത്.

അവിവാഹിതയായ സുജി, ഒരു മുഴുവൻ സമയ സാമൂഹി​ക പ്രവർത്തകയാണെന്ന് പറയാം. കണ്ടല്ലൂർ തെക്കൻ മേഖലയോട് കഴിഞ്ഞ കാലങ്ങളിലുണ്ടായ അവഗണന ഒഴി​വാക്കി​, പരമാവധി വികസനമാണ് തന്റെ ലക്ഷ്യമെന്ന് സുജി​ പറഞ്ഞു.