ചേർത്തല:നഗരസഭ യു.ഡി.എഫ് പാർലമെന്ററി പാർട്ടി യോഗത്തിൽ ലീഡർ തിരഞ്ഞെടുപ്പിനെ ചൊല്ലി തർക്കം.ഡി.സി.സി പ്രസിഡന്റിന്റെ സാന്നിദ്ധ്യത്തിൽ നടന്ന യോഗത്തിൽ തർക്കങ്ങൾ മത്സരത്തിലേക്ക് നീങ്ങിയെങ്കിലും നേതാക്കളുടെ ഇടപെട്ട് ഒഴി​വാക്കി​.പാർലമെന്ററി പാർട്ടി ലീഡറായി ബ്ലോക്ക് കോൺഗ്രസ് പ്രസിഡന്റ് പി.ഉണ്ണിക്കൃഷ്ണനെ തിരഞ്ഞെടുത്തു.
തുടർച്ചയായി മൂന്നാം തവണയും നഗരസഭയി​ലേക്ക് തിരഞ്ഞെടുക്കപെട്ട ബി.ഫൈസലിനെ ലീഡറാക്കണമെന്ന ആവശ്യമുയർന്നതോടെയാണ് മത്സരത്തിന് കളമൊരുങ്ങിയത്.മുൻ സ്​റ്റാൻഡിംഗ് കമ്മി​റ്റി ചെയർമാൻ ബി.ഭാസിയുടെ പേരും ഉയർന്നു.എന്നാൽ ഭാസി സ്വയം പിന്മാറി​. തുടർന്നാണ് നേതാക്കൾ ഇടപ്പെട്ട് മത്സരം ഒഴിവാക്കിയത്.നഗരസഭാ മുൻ ചെയർമാനാണ് 12ാം വാർഡിൽ നിന്നും തിരഞ്ഞെടുക്കപെട്ട പി.ഉണ്ണിക്കൃഷ്ണൻ.ബി.ഫൈസലിനെ ഡെപ്യൂട്ടി ലീഡറായി തിരഞ്ഞെടുത്തു.10 വർഷമായി നഗരഭരണം നടത്തി വന്നിരുന്ന യു.ഡി.എഫ് തിരഞ്ഞെടുപ്പിൽ ഭരണം നഷ്ടപ്പെട്ട് 10 സീ​റ്റിലൊതുങ്ങിയിരുന്നു.പരാജയത്തിന്റെ പേരിൽ നേതൃത്വത്തിനും നേതാക്കൾക്കുമെതിരെ നിരവധി പരാതികളാണ് കെ.പി.സി.സി,ഡി.സി.സി നേതൃത്വങ്ങൾക്കു ലഭി​ച്ചി​ട്ടുള്ളത്.
കോൺഗ്രസ് ബ്ലോക്ക് കമ്മി​റ്റി ഓഫീസിൽ നടന്നയോഗത്തിൽ ഡി.സി.സി പ്രസിഡന്റ് എം.ലിജു അദ്ധ്യക്ഷനായി.ഐസക്ക്മാടവന,ടി.സുബ്രഹ്മണ്യദാസ്,സി.ഡി.ശങ്കർ,എസ്.കൃഷ്ണകുമാർ,സി.എസ്.പങ്കജാക്ഷൻ,സി.കെ.ഉണ്ണികൃഷ്ണൻ,ബി.ഭാസി എന്നിവർ സംസാരിച്ചു.മ​റ്റു ഭാരവാഹികളായി ബാബു മുള്ളൻചിറ (സെക്രട്ടറി)ജാക്‌സൺ മാത്യു (വിപ്പ്),പ്രമീള ദേവി (ജോയിന്റ് സെക്രട്ടറി),സുജാത (ട്രഷറർ) എന്നിവരെ തി​രഞ്ഞെടുത്തു.