ന്യൂഡൽഹി: രാജ്യത്ത് കൊവിഡ് ബാധിതരുടെ എണ്ണം 97 ലക്ഷത്തോടടുത്തു. മരണം 1.40 ലക്ഷവും പിന്നിട്ടു. ആകെ രോഗമുക്തരുടെ എണ്ണം 91 ലക്ഷം കവിഞ്ഞു.

രോഗമുക്തി നിരക്ക് 94.37 ശതമാനമായി വർദ്ധിച്ചു. ചികിത്സയിലുള്ളവരുടെ എണ്ണം 4.03 ലക്ഷമായി കുറയുകയും ചെയ്തതായി കേന്ദ്ര ആരോഗ്യമന്ത്രാലയം അറിയിച്ചു.

138 ദിവസത്തിന് ശേഷമാണ് ചികിത്സയിലുള്ളവരുടെ എണ്ണം ഇത്രയും കുറയുന്നത്. പ്രതിദിന രോഗികളേക്കാൾ രോഗമുക്തരുടെ എണ്ണം ഉയരുന്നത് കഴിഞ്ഞ ഒമ്പത് ദിവസമായി തുടരുകയാണ്. നിലവിൽ രാജ്യത്തെ ആകെ രോഗികളുടെ 4.18ശതമാനം മാത്രമാണ് ചികിത്സയിലുള്ളത്. കഴിഞ്ഞ 24 മണിക്കൂറിനിടെ 36,011 പേർക്ക് കൊവിഡ് ബാധിച്ചു. 41,970 പേർ രോഗമുക്തരായി. ദശലക്ഷത്തിലെ രോഗികൾ 186 ആണ്. ഇത് ലോകത്തിലെ ഏറ്റവും കുറഞ്ഞ നിരക്കുകളിലൊന്നാണെന്ന് ആരോഗ്യമന്ത്രാലയം വ്യക്തമാക്കി. പുതുതായി രോഗമുക്തരായവരുടെ 76.6 ശതമാനവും മഹാരാഷ്ട്ര, കേരളം, ഡൽഹി തുടങ്ങിയ പത്തു സംസ്ഥാനങ്ങളിലാണ്.

പ്രതിദിന രോഗബാധിതർ കേരളത്തിലാണ് കൂടുതൽ. കഴിഞ്ഞ 24 മണിക്കൂറിനിടെ 482 പേർ മരിച്ചു. മഹാരാഷ്ട്രയിലാണ് കൂടുതൽ മരണം.