ന്യൂഡൽഹി: കൊവിഡ് വാക്സിൻ വിതരണത്തിന്റെ മുന്നോടിയായി ഡ്രൈ റൺ നാല് ഡിസംബർ 28,29 തീയതികളിൽ സംസ്ഥാനങ്ങളിൽ നടക്കും. ആന്ധ്ര,അസം, ഗുജറാത്ത്, പഞ്ചാബ് സംസ്ഥാനങ്ങളിലാണ് പരിശീലന പരിപാടി സംഘടിപ്പിക്കുന്നത്. നാലു സംസ്ഥാനങ്ങളിലും രണ്ട് ജില്ലകളിൽ വീതം ജില്ലാ ആശുപത്രികൾ, സ്വകാര്യ ആശുപത്രികൾ തുടങ്ങിയവിടങ്ങളിലാണ് വാക്സിൻ വിതരണവുമായി ബന്ധപ്പെട്ട് ആസൂത്രണം ചെയ്ത നടപടികളുടെ പ്രവർത്തന സാദ്ധ്യത വിലയിരുത്തുക.
വാക്സിൻ നൽകിയ ശേഷമുണ്ടായേക്കാവുന്ന മോശം സാഹചര്യത്തെ നേരിടാനുള്ള പ്രവർത്തനങ്ങളാണ് പ്രധാനമായും മോക്ഡ്രില്ലിലൂടെ ലക്ഷ്യമിടുന്നത്.
വാക്സിൻ വിതരണവുമായി ബന്ധപ്പെട്ട് വ്യത്യസ്ത മേഖലകളിൽ പ്രവർത്തിക്കുന്ന മെഡിക്കൽ ഓഫീസർമാർ, വാക്സിൻ നൽകുന്നവർ, ശീതീകരണ ശൃംഖലയിലുള്ളവർ, ഡാറ്റാ മാനേജർമാർ, ആശാ കോർഡിനേറ്റർമാർ എന്നിവർക്ക് ആവശ്യമായ വിശദമായ പരിശീലന പരിപാടി കേന്ദ്രസർക്കാർ തുടങ്ങിയിട്ടുണ്ട്. വാക്‌സിനേഷൻ പരിപാടി നിർവഹണം, വാക്‌സിനേഷൻ നടപടികൾക്കായി കൊവിൻ പ്ലാറ്റ്‌ഫോമിന്റെ ഉപയോഗം, ആശയവിനിമയം, മേഖലകൾ തമ്മിലുള്ള ഏകോപനം, ബയോമെഡിക്കൽ മാലിന്യ നിർമാർജനം എന്നിവയിലുള്ള പരിശീലനം നൽകുന്നത്.