ന്യൂഡൽഹി: കർഷക സമരത്തിന് ഐക്യദാർഢ്യം പ്രഖ്യാപിച്ച് ഡൽഹി മുഖ്യമന്ത്രി അരവിന്ദ് കെജ്‌രിവാൾ കർഷക പ്രക്ഷോഭവേദിയിലെത്തി. കാർഷിക നിയമങ്ങൾ എങ്ങനെയാണ് കർഷകർക്ക് ഗുണകരമാകുന്നത് എന്ന് പറയാൻ കഴിയുന്ന ഒരു കേന്ദ്ര നേതാവിനെ പോലും തനിക്ക് കാണാൻ സാധിച്ചില്ലെന്ന് അദ്ദേഹം പറഞ്ഞു. കഴിഞ്ഞ 32 ദിവസമായി കർഷകർ കടുത്ത ശൈത്യത്തെ അതിജീവിച്ച് തെരുവിൽ കഴിയുകയാണ്. നാല്പതിലധികം ആളുകൾ മരിച്ചു. ഇതെന്നിൽ വേദനയുണ്ടാക്കുന്നു. കർഷകരെകേൾക്കാനും നിയമങ്ങൾ പിൻവലിക്കാനും കേന്ദ്ര സർക്കാരിനോട് അഭ്യർത്ഥിക്കുകയാണ്. കാർഷിക നിയമങ്ങളെ കുറിച്ച് വ്യക്തമായി അറിയുന്ന കേന്ദ്രനേതാക്കളോട് കർഷകരുമായി സംവാദം നടത്താൻ ഞാൻ വെല്ലുവിളിക്കുകയാണ്. ആർക്കാണ് കൂടുതൽ അറിയുന്നത് എന്ന് അപ്പോൾ മനസിലാക്കാം. '' അദ്ദേഹം പറഞ്ഞു.

ഡൽഹി - ഹരിയാന അതിർത്തിയായ സിംഘുവിൽ രണ്ടാം തവണയാണ് കർഷകർക്ക് പിൻതുണയറിച്ച് കെജ്‌രിവാൾ എത്തുന്നത്. ഇന്നലെ വൈകിട്ട് ആറ് മണിയോടെ എത്തിയ അദ്ദേഹം സിഖ് ഗുരുവിന്റെ രക്തസാക്ഷി ദിനവുമായി ബന്ധപ്പെട്ട് സംഘടിപ്പിക്കുന്ന ഷഹീദി ദിവസ് പരിപാടിയിലും പങ്കെടുത്തു. മന്ത്രി മനീഷ് സിസോദിയയും അദ്ദേഹത്തിനൊപ്പമുണ്ടായിരുന്നു.