കൊച്ചി: തദ്ദേശ തിരഞ്ഞെടുപ്പിൽ ചെണ്ട അടയാളത്തിൽ മത്സരിക്കുന്ന സ്ഥാനാർത്ഥികളെ കേരള കോൺഗ്രസ് (എം) പി.ജെ. ജോസഫ് വിഭാഗമായി പരിഗണിക്കണമെന്ന് ഹൈക്കോടതി നിർദ്ദേശിച്ചു. ഇവരെ സ്വതന്ത്രരാണെന്നു സംസ്ഥാന തിരഞ്ഞെടുപ്പു കമ്മിഷന്റെ വെബ്സൈറ്റിൽ രേഖപ്പെടുത്തിയതു ചോദ്യം ചെയ്‌ത് പി.ജെ. ജോസഫും പാല സ്വദേശി പി.സി. കുര്യാക്കോസും നൽകിയ ഹർജിയിലാണ് സിംഗിൾ ബെഞ്ചിന്റെ ഇടക്കാല ഉത്തരവ്. പി.സി. കുര്യാക്കോസ് പാലയിൽ മത്സരിക്കുന്നുമുണ്ട്.
കേരള കോൺഗ്രസ് (എം) എന്ന പേരും രണ്ടില ചിഹ്നവും ജോസ് കെ. മാണി വിഭാഗത്തിന് അവകാശപ്പെട്ടതാണെന്ന് നേരത്തെ സിംഗിൾബെഞ്ച് വിധിയുണ്ട്. ഇതിനെതിരെ പി.ജെ. ജോസഫ് നൽകിയ അപ്പീൽ ഡിവിഷൻ ബെഞ്ചിന്റെ പരിഗണനയിലാണ്. ചിഹ്നം അനുവദിച്ചത് ഡിവിഷൻ ബെഞ്ച് സ്റ്റേ ചെയ്യാത്തതിനാൽ ജോസ് വിഭാഗത്തിന്റെ സ്ഥാനാർത്ഥികൾക്ക് തിരഞ്ഞെടുപ്പു കമ്മിഷൻ രണ്ടില ചിഹ്നം അനുവദിച്ചിരുന്നു.