കൊച്ചി: എ.ടി.എം സേവനങ്ങൾ വീട്ടിലെത്തിക്കുന്ന 'മൈക്രോ എ.ടി.എമ്മുമായി" കൊച്ചി ഇൻഫോപാർക്ക് ആസ്ഥാനമായ ഏസ്‌വെയർ ഫിൻടെക് സർവീസസ്. ഇന്നുമുതൽ കൊച്ചിനഗരത്തിൽ സേവനം ലഭ്യമാകും. ഐ.സി.ഐ.സി.ഐ ബാങ്കുമായി സഹകരിച്ചാണ് പദ്ധതി. ഗൂഗിൾ പ്ലേസ്റ്റോറിലും ആപ്പിൾ സ്റ്റോറിലും ലഭ്യമായ ഏസ്‌മണി ആപ്പിലൂടെ ഇടപാടുകാർക്ക് വീട്ടിലിരുന്ന് പണത്തിന് ഓർഡർ നൽകാമെന്ന് ഏസ് വെയർ ഫിൻടെക് സർവീസസ് മാനേജിംഗ് ഡയറക്‌ടർ നിമിഷ ജെ. വടക്കൻ വാർത്താസമ്മേളനത്തിൽ പറഞ്ഞു.

ജനുവരിയോട് കൂടി സംസ്ഥാനത്തെ എല്ലാ മുനിസിപ്പാലിറ്റികളിലും സേവനം എത്തിക്കും. 40 മിനിറ്റിനുള്ളിൽ വീട്ടിലെത്തുന്ന എക്‌സിക്യുട്ടീവിന്റെ കൈവശമുള്ള സ്വൈപ്പിംഗ് മെഷീനിലൂടെ ഏത് ബാങ്കിന്റെ ഡെബിറ്റ് കാർഡായാലും പണം എടുക്കാം. മുതിർന്ന പൗരൻമാർക്കും രോഗികൾക്കും മൈക്രോ എ.ടി.എം ഏറെ പ്രയോജനപ്പെടും.

ഒരുതവണ പരമാവധി 10,000 രൂപയാണ് പിൻവലിക്കാനാകുക. എന്നാൽ, പ്രതിദിനം അതത് ബാങ്കുകൾ നിശ്ചയിച്ചിട്ടുള്ള പരമാവധി തുക പിൻവലിക്കാം. പണം കൈമാറ്റം, ബിൽ അടയ്ക്കാൻ, റീചാർജ്, ഫാസ്ടാഗ്, കെട്ടിട, ഭൂനികുതി അടവ്, ബസ്, ഫ്‌ളൈറ്റ്, സിനിമ ടിക്കറ്റ് ബുക്കിംഗ്, ഇൻഷ്വറൻസുകൾ, ജനന, മരണ സർട്ടിഫിക്കറ്റുകൾക്കുള്ള അപേക്ഷ തുടങ്ങി 100ലേറെ സേവനങ്ങളും ആപ്പിലൂടെ ലഭ്യമാകും.

സി.ഇ.ഒ ജിമിൻ ജെയിംസ് കുറിച്ചിയിൽ, ജനറൽ മാനേജർ സെബാസ്റ്റ്യൻ സേവ്യർ എന്നിവരും വാർത്താസമ്മേളനത്തിൽ പങ്കെടുത്തു.