കേരളത്തിന്റെ സാദ്ധ്യതകൾ ചർച്ച ചെയ്‌ത് ടൈകോൺ കേരള
കൊച്ചി: സംരംഭക വളർച്ചയ്ക്ക് കേരളം ഏറെ ആനുയോജ്യമാണെന്ന് കേന്ദ്രമന്ത്രി നിതിൻ ഗഡ്‌കരി പറഞ്ഞു. സംരംഭ മേഖലയിൽ കേരളത്തിന്റെ സാദ്ധ്യതകൾ ചർച്ച ചെയ്‌ത ത്രിദിന ടൈകോൺ കേരള-2020 സമാപന സമ്മേളനം ഉദ്ഘാടനം ചെയ്യുകയായിരുന്നു അദ്ദേഹം. നിരവധി പ്രമുഖർ സമ്മേളനത്തിൽ സംബന്ധിച്ചു.
തീരദേശ മേഖലയ്ക്കുള്ള ഭൂമിശാസ്ത്രപരമായ സാദ്ധ്യതകൾ വഴി വലിയ നേട്ടങ്ങൾ കേരളത്തിന് കൈവരിക്കാമെന്ന് ഗഡ്‌കരി പറഞ്ഞു. രാജ്യത്തുടനീളം വർദ്ധിക്കുന്ന കണക്ടിവിറ്റി സൗകര്യങ്ങൾ വഴിയുള്ള അവസരങ്ങളും അനവധിയാണെന്നും അദ്ദേഹം പറഞ്ഞു.
ടൈകേരള പ്രസിഡന്റ് അജിത് മൂപ്പൻ ലക്ഷ്യങ്ങൾ വിശദീകരിച്ചു. സംരംഭകരിൽ ആത്മവിശ്വാസം വളർത്തുകയും സ്റ്റാർട്ടപ്പുകൾ, പ്രൊഫഷണലുകൾ എന്നിവർക്ക് വളർച്ചയ്ക്ക് മാർഗനിർദ്ദേശം നൽകുകയും ചെയ്യും. നിക്ഷേപകർ, ഉപദേഷ്ടാക്കൾ, ബിസിനസ് പങ്കാളികൾ എന്നിവരുമായി കൂടിക്കാഴ്ചയ്ക്കും ടൈക്കോൺ അവസരമൊരുക്കും. ടൈകോൺ ഡയറക്ടറും കൺവീനറുമായ ഹരികൃഷ്‌ണൻ നായർ, ചാർട്ടർ മെമ്പർ സന്തിത്ത് തണ്ടാശേരി എന്നിവർ സംസാരിച്ചു.