മൂവാറ്റുപുഴ: നാടൻ കൊയ്ത്ത് പാട്ടിന്റെ താള മേളത്തോടെ മുളവൂർ പാടശേഖരത്ത് കൊയ്ത്ത് ഉത്സവം. സംസ്ഥാന കൃഷി വകുപ്പ് ആവിഷ്‌കരിച്ച് നടപ്പാക്കുന്ന സുഭിക്ഷ കേരളം പദ്ധതിയുടെ ഭാഗമായി പായിപ്ര സർവ്വീസ് സഹകരണ ബാങ്കിന്റെ ആഭിമുഖ്യത്തിൽ ഐശ്വര്യ സ്വയം സഹായ സംഘത്തിന്റെ നേതൃത്വത്തിൽ പായിപ്ര പഞ്ചായത്ത് ആറാം വാർഡിൽ ചിറപ്പടിയിൽ ഒരേക്കർ വരുന്ന മുളവൂർ പാടശേഖരത്തിലെ നെൽകൃഷിയുടെ കൊയ്ത്ത് ഉത്സവം കേരള ബാങ്ക്പ്രസിഡന്റ് ഗോപി കോട്ടമുറിയ്ക്കൽ ഉദ്ഘാടനം ചെയ്തു. പായിപ്ര സർവ്വീസ് സഹകരണ ബാങ്ക് പ്രസിഡന്റ് കെ.എസ്.റഷീദ് അദ്ധ്യക്ഷത വഹിച്ചു. വൈസ് പ്രസിഡന്റ് വി.എസ്.മുരളി, നഗരസഭ കൗൺസിലർ ഷമീർ പനയ്ക്കൽ, പഞ്ചായത്ത് മെമ്പർമാരായ ഇ.എം.ഷാജി, ബെസ്സി എൽദോസ്, ദീപ റോയി, ഐശ്വര്യ സ്വയം സഹായസംഘം പ്രസിഡന്റ് വി.എ.ഷരീഫ്, സെക്രട്ടറി പി.എം.മനോജ് എന്നിവർ സംസാരിച്ചു. പായിപ്ര കൃഷി ഭവന്റെ സഹകരണത്തോടെ ഉമ നെൽവിത്താണ് വിതച്ചത്.