തിരുവനന്തപുരം: അപകടമുണ്ടാക്കിയ ശേഷം വാഹനം നിറുത്താതെ കടന്നുകളയുന്ന വാഹന ഉടമകളെ കണ്ടെത്തണമെന്ന് സംസ്ഥാന മനുഷ്യാവകാശ കമ്മിഷൻ അദ്ധ്യക്ഷൻ ജസ്റ്റിസ് ആന്റണി ഡൊമനിക്. ആധുനിക വാർത്താ വിനിമയ സൗകര്യങ്ങളുടെ സഹായത്തോടെ ഉടമകളെ കണ്ടെത്തണമെന്ന ആവശ്യം അടിയന്തരമായി പരിശോധിച്ച് ചീഫ് സെക്രട്ടറി, ആഭ്യന്തര സെക്രട്ടറി, സംസ്ഥാന പൊലീസ് മേധാവി എന്നിവർ നാലാഴ്ചയ്ക്കകം റിപ്പോർട്ട് സമർപ്പിക്കണമെന്നാണ് ആവശ്യം. മുൻ ചീഫ് സെക്രട്ടറി സി.പി. നായർ സമർപ്പിച്ച പരാതിയിലാണ് നടപടി. അപകടത്തിൽ മുറിവേറ്റ വ്യക്തിയെ എത്രയും വേഗം അടുത്തുള്ള ആശുപത്രിയിലെത്തിക്കേണ്ട ബാധ്യത അപകടമുണ്ടാക്കിയ വ്യക്തിക്കുണ്ടെന്നും അങ്ങനെ ചെയ്യാതിരിക്കുന്നത് ശിക്ഷാർഹമായ നിയമലംഘനമാണെന്നും പരാതിയിൽ പറയുന്നു. വാഹനം പിടിച്ചെടുക്കാൻ ഉദ്യോഗസ്ഥർ ഉദാസീനത കാണിക്കുന്നു. സാങ്കേതിക വിദഗ്ദ്ധരുമായി കൂടിയാലോചന നടത്തി ഫലപ്രദമായ നടപടി സ്വീകരിക്കണക്കണമെന്നാണ് ആവശ്യം. റിപ്പോർട്ട് ലഭിച്ച ശേഷം കമ്മിഷൻ അനന്തര നടപടികൾ സ്വീകരിക്കും.