ഇടുക്കി ജില്ലയിൽ തിരഞ്ഞെടുപ്പ് പ്രക്രിയ സമാധാനപരമായി പൂർത്തിയാക്കുന്നതിന് സഹകരിച്ച എല്ലാവർക്കും ജില്ലാ തിരഞ്ഞെടുപ്പ് ഓഫീസർ ജില്ലാ കലക്ടർ എച്ച് ദിനേശൻ നന്ദി അറിയിച്ചു. ഉച്ചയ്ക്ക് മൂന്ന് മുപ്പതോടെ ജില്ലയിലെ വോട്ടെണ്ണൽ നടപടി പൂർത്തിയാക്കി ജില്ലാ പഞ്ചായത്തിലേക്ക് വിജയിച്ചവരെ പ്രഖ്യാപിച്ചു. സംസ്ഥാനത്ത് ഇടുക്കി ജില്ലയിലാണ് ആദ്യ വിജയ പ്രഖ്യാപനം ഉണ്ടായത്. തുടർന്ന് വിജയികൾക്കുള്ള സർട്ടിഫിക്കറ്റും വിതരണം ചെയ്തു. ജില്ലാ പഞ്ചായത്ത് അംഗങ്ങളുടെ സത്യപ്രതിജ്ഞ ഡിസംബർ 21, രാവിലെ 10 മണിക്ക് ജില്ലാ പഞ്ചായത്ത് ഹാളിൽ നടത്തും. ഗ്രാമ, ബ്ലോക്ക് പഞ്ചായത്തുകളിലും ഇതേ സമയം സത്യപ്രതിജ്ഞ തദ്ദേശ സ്ഥാപനങ്ങളിൽ നടത്തും. മുനിസിപ്പൽ കോർപ്പറേഷനുകളിലെ സത്യപ്രതിജ്ഞ തദ്ദേശ സ്ഥാപനങ്ങളിൽ അന്ന്് 11.30നും നടത്തും. തിരഞ്ഞെടുക്കപ്പെട്ട മുതിർന്ന അംഗത്തിന് വരണാധികാരി സത്യവാചകം ചൊല്ലിക്കൊടുക്കും. മറ്റ് അംഗങ്ങളെ ആദ്യം സത്യപ്രതിജ്ഞ അംഗം സത്യപ്രതിജ്ഞയോ ദൃഢപ്രതിജ്ഞയോ ചെയ്യിക്കും. സത്യപ്രതിജ്ഞാ ചടങ്ങുകഴിഞ്ഞാൽ ഉടൻ തിരഞ്ഞെടുക്കപ്പെട്ട എല്ലാ അംഗങ്ങളുടേയും ആദ്യ യോഗം ആദ്യം പ്രതിജ്ഞ ചെയ്്ത അംഗത്തിന്റെ അദ്ധ്യക്ഷതയിൽ ചേരും. പ്രസ്തുത യോഗത്തിൽ പ്രസിഡന്റ്് / ചെയർപേഴ്‌സൺ, വൈസ് പ്രസിഡന്റ്് / ഡെപ്യൂട്ടി ചെയർപേഴ്‌സൺ എന്നീ സ്ഥാനങ്ങളിലേക്കുള്ള തിരഞ്ഞെടുപ്പ് വരണാധികാരികൾ നടത്തും. ഇതിനുള്ള നിർദ്ദേശങ്ങൾ കമ്മീഷനിൽ നിന്ന് ഉടൻ ഉണ്ടാകുമെന്നും ജില്ലാ തിരഞ്ഞെടുപ്പ് ഓഫീസർ അറിയിച്ചു.