ഇടുക്കി: ജില്ലയുടെ പുരോഗതിക്കും ജനത്തിന്റെ നൻമയ്ക്കുമായി ജനപ്രതിനിധികൾ വിട്ടു വീഴ്ചയില്ലാത്ത നടപടി സ്വീകരിക്കണമെന്ന് മന്ത്രി എംഎം മണി. ജില്ലാ പഞ്ചായത്ത് അംഗങ്ങളുടെ സത്യ പ്രതിജ്ഞാ വേളയിൽ ആശംസകൾ അർപ്പിച്ചു സംസാരിക്കുകയായിരുന്നു അദ്ദേഹം.

ജില്ലാ വരണാധികാരി കൂടിയായ ജില്ലാ കളക്ടർ എച്ച് ദിനേശൻ മുതിർന്ന ജില്ലാപഞ്ചായത്തംഗം മൂലമറ്റം ഡിവിഷനിൽ നിന്ന് വിജയിച്ച പ്രൊഫ. എം.ജെ .ജേക്കബിന് സത്യവാചകം ചൊല്ലിക്കൊടുത്തു. ബാക്കി 15 അംഗങ്ങൾക്കും പ്രൊഫ. എംജെ ജേക്കബാണ് സത്യവാചകം ചൊല്ലിക്കൊടുത്തത്. തുടർന്ന് ജില്ലാ പഞ്ചായത്ത് ഹാളിൽ എംജെ ജേക്കബിന്റെ അദ്ധ്യക്ഷതയിൽ പ്രഥമ യോഗം ചേർന്നു. തദ്ദേശ സ്വയംഭരണ മന്ത്രി എസി മൊയ്ദീന്റെ ആശംസ ജില്ലാ പഞ്ചായത്ത് അംഗങ്ങൾക്ക് കൈമാറി.ജില്ലാ പഞ്ചായത്ത് പ്രസിഡന്റ് തിരഞ്ഞെടുപ്പ് 30നു രാവിലെ 11 നും വൈസ് പ്രസിഡന്റ് തിരഞ്ഞെടുപ്പ് അന്ന് ഉച്ചയ്ക്ക് ശേഷം 2 നും നടത്തും.