മുതലക്കോടം: മുനിസിപ്പൽ ഒമ്പതാം വാർഡിൽ യുഡിഎഫ് സ്ഥാനാർഥിയായി വിജയിച്ച ശേഷം അധികാരത്തിനായി എൽഡിഎഫിലേക്ക് കൂറുമാറിയ ജെസി ജോണിയുടെ രാഷ്ട്രീയ വഞ്ചനയെ രാഷ്ട്രീയമായും നിയമപരമായും നേരിടുമെന്ന് മുസ് ലിം ലീഗ് സംസ്ഥാന സെക്രട്ടറി ടി .എം സലിം പറഞ്ഞു. മുതലക്കോടത്ത് യുഡിഎഫ് സംഘടിപ്പിച്ച പ്രതിഷേധയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
അധികാരത്തിനും സാമ്പത്തിക നേട്ടങ്ങൾക്കുമായുള്ള കൂറുമാറ്റം വാർഡിലെ വോട്ടർമാരോടുള്ള വെല്ലുവിളിയാണ്. രാഷ്ട്രീയ വഞ്ചന നടത്തിയ ജെസി ജോണി രാജിവച്ചൊഴിയണമെന്ന് അദ്ദേഹം ആവശ്യപ്പെട്ടു.
കെ പി സി സി ജനറൽ സെക്രട്ടറി റോയി കെ പൗലോസ് മുഖ്യപ്രഭാഷണം നടത്തി. ജോസി ജേക്കബ്, പി എൻ സീതി, ടി. കെ നവാസ് എന്നിവർ പ്രസംഗിച്ചു.