കാഞ്ഞങ്ങാട്: സീറ്റ് വിഭജന തർക്കം കാരണം ജില്ലയിലെ യു.ഡി.എഫുമായി നിസഹകരിക്കുവാൻ തീരുമാനമെടുത്തിരുന്ന കേരള കോൺഗ്രസ് (ജോസഫ്) മുതിർന്ന സംസ്ഥാന നേതാക്കളുടെ ഇടപെടലിനെത്തുടർന്ന് തീരുമാനം മാറ്റി. യു.ഡി.എഫുമായി സഹകരിക്കും. കഴിഞ്ഞദിവസം ജില്ലയിലെത്തിയ മുൻ മുഖ്യമന്ത്രി ഉമ്മൻചാണ്ടിയുടെ നിർദ്ദേശം മാനിച്ചും പ്രതിപക്ഷ നേതാവ് രമേശ് ചെന്നിത്തല, കേരള കോൺഗ്രസ് പാർട്ടി ചെയർമാൻ പി.ജെ ജോസഫ് എന്നിവരുടെ കർശന നിലപാടും സ്വീകരിച്ചാണ് തീരുമാനം. ജില്ലാ പഞ്ചായത്ത് ചിറ്റാരിക്കൽ ഡിവിഷൻ സ്ഥാനാർത്ഥിത്വത്തിൽനിന്നും ജെയിംസ് മാരൂർ പിൻവാങ്ങുവാൻ തീരുമാനിച്ചു. ഈസ്റ്റ് എളേരി പഞ്ചായത്തിലെ 8, 10 വാർഡുകളിലെ സ്ഥാനാർത്ഥികളെയും പിൻവലിക്കും.. പനത്തടി, ബളാൽ പഞ്ചായത്തുകളിൽ സൗഹൃദമത്സരം നടത്തുവാനും തീരുമാനിച്ചു. മുൻ എം.എൽ.എ കെ.പി. കുഞ്ഞിക്കണ്ണൻ, യു.ഡി.എഫ് ജില്ലാ കൺവീനർ എ. ഗോവിന്ദൻ നായർ, കേരള കോൺഗ്രസ് ജില്ലാ പ്രസിഡന്റ് ജെറ്റോ ജോസഫ്, എം. ജയിംസ് എന്നിവർ പങ്കെടുത്ത ചർച്ചയിലാണ് തീരുമാനം.