കണ്ണുർ: തദ്ദേശ സ്വയംഭരണ സ്ഥാപനങ്ങളിലേക്കുള്ള യു.ഡി.എഫ് സ്ഥാനാർത്ഥികളുടെ തിരഞ്ഞെടുപ്പ് പ്രചരണാർത്ഥം മുസ്ലിം ലീഗ് സംസ്ഥാന പ്രസിഡന്റ് പാണക്കാട് സയ്യിദ് ഹൈദരലി ശിഹാബ് തങ്ങളും ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടിയും 11 ന് ജില്ലയിൽ നേതൃസംഗമങ്ങളിൽ പങ്കെടുക്കും. കാലത്ത് 10 മണി തളിപ്പറമ്പ്,​ വൈകിട്ട് മൂന്നിന് കണ്ണൂർ ബാഫഖി സൗധം,​ 5ന് പാനൂർ മുസ്ലിം ലീഗ് ഓഫീസ് എന്നിവിടങ്ങളിലെത്തും.

ലീഗിന്റെയും പോഷക ഘടകങ്ങളുടെയും മണ്ഡലം നേതാക്കളും യു.ഡി.എഫ് പഞ്ചായത്ത് ചെയർമാൻ കൺവീനർമാരുമാണ് നേതൃസംഗമങ്ങളിൽ പങ്കെടുക്കേണ്ടത്. പയ്യന്നൂർ ,തളിപ്പറമ്പ് ,കല്യാശ്ശേരി, ഇരിക്കൂർ മണ്ഡലങ്ങളിലെ നേതാക്കൾ തളിപ്പറമ്പിലും,​ അഴീക്കോട്, കണ്ണൂർ, ധർമ്മടം മണ്ഡലങ്ങളിലുള്ളവർ കണ്ണൂരിലും മട്ടന്നൂർ, പേരാവൂർ, കൂത്തുപറമ്പ് ,തലശ്ശേരി മണ്ഡലങ്ങളിലെ നേതാക്കൾ പാനൂരിലും നേതൃസംഗമങ്ങളിൽ പങ്കെടുക്കണമെന്ന് ജില്ലാ പ്രസിഡന്റ് പി. കുഞ്ഞിമുഹമ്മദും ജനറൽ സെക്രട്ടറി അഡ്വ: അബ്ദുൽ കരീംചേലേരിയും അറിയിച്ചു.