കണ്ണൂർ: രണ്ടാം വർഷ ബി.എഡ് വിദ്യാർത്ഥികൾക്ക് അദ്ധ്യാപക പരിശീലനം തുടങ്ങാത്തതു മൂലം കോഴ്‌സ് പൂർത്തീകരിക്കാൻ കഴിയാതെ ഒരു വർഷം പാഴാവുന്ന സാഹചര്യത്തിൽ പ്രതിഷേധവുമായി കെ.എസ്.യു. കേരളത്തിലെ മറ്റു യൂണിവേഴ്‌സിറ്റികൾ ഓൺലൈൻ ക്ലാസുകൾ വഴി അദ്ധ്യാപക പരിശീലനം ഉൾപ്പെടെ നടത്തി കോഴ്‌സ് പൂർത്തീകരിച്ച സാഹചര്യത്തിൽ കണ്ണൂർ സർവകലാശാലയുടെ ഭാഗത്തു നിന്നുള്ള സമീപനം വിദ്യാർത്ഥി വിരുദ്ധവും പ്രതിഷേധാർഹവുമാണെന്നാണ് കെ.എസ്.യുവിന്റെ ആരോപണം.
നടപടിയിൽ പ്രതിഷേധിച്ച് ജില്ലാ കമ്മിറ്റിയുടെ നേതൃത്വത്തിൽ കണ്ണൂർ സർവകലാശാല ആസ്ഥാനം ഉപരോധിച്ചു.തുടർന്ന് കെ.എസ്.യു നേതാക്കളുമായി പ്രൊ വൈസ് ചാൻസിലർ പ്രൊഫ. പി.ടി രവീന്ദ്രൻ ചർച്ച നടത്തി. അടിയന്തരമായി വിദഗ്ധ സമിതിയെ നിയോഗിക്കുമെന്നും സമിതിയുടെ നിർദ്ദേശങ്ങൾ കൂടെ പരിഗണിച്ച് സമയബന്ധിതമായി കോഴ്‌സ് പൂർത്തീകരിക്കാനാവശ്യമായ നടപടി സ്വീകരിക്കുമെന്നും ഉറപ്പ് നൽകിയതിന്റെ അടിസ്ഥാനത്തിൽ ഉപരോധം അവസാനിപ്പിച്ചു. കെ.എസ്.യു ജില്ലാ പ്രസിഡന്റ് പി.മുഹമ്മദ് ഷമ്മാസ് ഉപരോധം ഉദ്ഘാടനം ചെയ്തു. ജില്ലാ വൈസ് പ്രസിഡന്റ് സി.ടി. അഭിജിത്, ജില്ലാ ജനറൽ സെക്രട്ടറി ഫർഹാൻ മുണ്ടേരി, ബ്ലോക്ക് പ്രസിഡന്റുമാരായ ഹരികൃഷ്ണൻ പാലാട് എന്നിവർ സംബന്ധിച്ചു.