കൽപ്പറ്റ: സുരക്ഷാ ക്രമീകരണങ്ങൾക്കായി 1785 പൊലീസ് സേനാംഗങ്ങളെ വിന്യസിച്ചതായി ജില്ലാ പൊലീസ് മേധാവി ജി.പൂങ്കുഴലി അറിയിച്ചു. ജില്ലയെ മൂന്ന് ഇലക്ഷൻ സബ് ഡിവിഷനുകളായി വിഭജിച്ച് ഓരോ സബ് ഡിവിഷന്റെയും മേൽനോട്ടത്തിനായി ഡെപ്യൂട്ടി പൊലീസ് സൂപ്രണ്ട്, അസിസ്റ്റന്റ് പൊലീസ് സൂപ്രണ്ട് എന്നിവരെയാണ് ചുമതലപ്പെടുത്തിയിട്ടുള്ളത്. കൂടാതെ മോട്ടോർ വാഹനം, എക്‌സൈസ്, ഫോറസ്റ്റ് വകുപ്പുകളിൽ നിന്നും സേനാംഗങ്ങളെ ഇലക്ഷൻ ജോലിക്ക് നിയോഗിച്ചിട്ടുണ്ട്.

216 സ്‌പെഷ്യൽ പൊലീസ് ഓഫീസർമാരെയും വിവിധ ബൂത്തുകളിലായി വിന്യസിച്ചു. മാവോയിസ്റ്റ് ബാധിതമായ 132 ബൂത്തുകളിൽ ആന്റി നക്സൽ ഫോഴ്സിലെ സേനാംഗങ്ങളെ നിയോഗിച്ചിട്ടുണ്ട്. വെബ്കാസ്റ്റിംഗ്/ വീഡിയോഗ്രഫി ഉള്ള 152 ബൂത്തുകൾ ഉൾപ്പെടെ 222 ബൂത്തുകളിലും ഫോറസ്റ്റിനോട് ചേർന്നുള്ള മൂന്ന് ബൂത്തുകളിലും കൂടുതൽ പൊലീസ് ജീവനക്കാരെ വിന്യസിച്ചു. എല്ലാ പൊലീസ് സ്റ്റേഷനുകളിലും, ജില്ലാ ആസ്ഥാനത്തും, സബ് ഡിവിഷൻ ആസ്ഥാനത്തും സർക്കിൾ ഇൻസ്‌പെക്ടർമാരുടെ നേതൃത്വത്തിൽ പ്രത്യേകം സ്‌ട്രൈക്കിംഗ് ഫോഴ്സുകളെയും ഏർപ്പെടുത്തിയിട്ടുണ്ട്.

174 വാഹനങ്ങളാണ് ക്രമീകരിച്ചിട്ടുള്ളത്. ഓരോ ബൂത്തിലും അര മണിക്കൂറിനുള്ളിൽ എത്തുന്ന വിധത്തിലാണ് പട്രോളിങ്. പൊതുജനങ്ങൾക്ക് തിരഞ്ഞെടുപ്പുമായി ബന്ധപ്പെട്ട സംശയ നിവാരണത്തിനും, വിവരങ്ങൾ അറിയിക്കുന്നതിനുമായി 9497980833, 94936202527 എന്നീ നമ്പരുകളിലും 100, 112 എന്ന ടോൾ ഫ്രീ നമ്പരുകളിലും ബന്ധപ്പെടാം.