കോഴിക്കോട്: തദ്ദേശ തിരഞ്ഞെടുപ്പിന്റെ വോട്ടെണ്ണലിനുള്ള ഒരുക്കങ്ങൾ ജില്ലയിൽ പൂർത്തിയായി. 20 കേന്ദ്രങ്ങളിലായി ഇന്ന് രാവിലെ എട്ടിന് വോട്ടെണ്ണൽ ആരംഭിക്കും. ആദ്യ ഫലസൂചന 8.15 മുതൽ ലഭിച്ച് തുടങ്ങും. കുറവ് വാർഡുകളുള്ള പഞ്ചായത്തുകളുടെ ഫലം ഒൻപത് മണിയോടെ പുറത്തുവരും. ഉച്ചയോടെ മുഴുവൻ പഞ്ചായത്തുകളുടെയും ഫലം ലഭ്യമാകും. 1500 ഉദ്യോഗസ്ഥരാണ് വോട്ടെണ്ണുക. എട്ട് ബൂത്തിന് ഒരു ടേബിൾ എന്ന നിലയിലാണ് വോട്ടെണ്ണലിന് സൗകര്യമൊരുക്കിയിട്ടുള്ളത്.
വോട്ടെണ്ണലിന് 12 ബ്ലോക്ക് പഞ്ചായത്ത്, ഏഴ് മുനിസിപ്പാലിറ്റി, ഒരു കോർപ്പറേഷൻ എന്നിവയ്ക്കായി ഓരോ കൗണ്ടിംഗ് സെന്ററുകൾ വീതമാണുണ്ടാവുക. കൊവിഡ് മാനദണ്ഡങ്ങൾ പൂർണമായും പാലിച്ചായിരിക്കും വോട്ടെണ്ണൽ പ്രക്രിയ.
ഒരു വാർഡിലെ എല്ലാ പോളിംഗ് സ്റ്റേഷനുകളിലെയും വോട്ടെണ്ണൽ ഒരു ടേബിളിൽ തന്നെയാണ് ക്രമീകരിച്ചിട്ടുള്ളത്. കൗണ്ടിംഗ് ഹാളിൽ സജ്ജീകരിച്ചിട്ടുള്ള വോട്ടെണ്ണൽ മേശകളുടെ എണ്ണം കണക്കാക്കിയാകും സ്‌ട്രോംഗ് റൂമിൽ നിന്നു കൺട്രോൾ യൂണിറ്റുകൾ എത്തിക്കുക. ഒന്നാം വാർഡ് മുതൽ എന്ന ക്രമത്തിലാണ് വോട്ടെണ്ണൽ ആരംഭിക്കുക. ഒരു വാർഡിൽ ഒന്നിലധികം ബൂത്തുകളുണ്ടെങ്കിൽ അവ ഒരു ടേബിളിൽ എണ്ണും.
ത്രിതല പഞ്ചായത്തുകളിൽ ഓരോ ടേബിളിലും ഒരു കൗണ്ടിംഗ് സൂപ്പർവൈസറും രണ്ട് കൗണ്ടിംഗ് അസിസ്റ്റന്റുമാരും നഗരസഭകളിൽ ഒരു കൗണ്ടിംഗ് സൂപ്പർവൈസറും ഒരു കൗണ്ടിംഗ് അസിസ്റ്റന്റുമുണ്ടാകും. വോട്ടെണ്ണൽ നില ട്രെൻഡ് ആപ്ലിക്കേഷനിലേക്ക് നൽകുന്നതിന് ടെക്‌നിക്കൽ ജീവനക്കാരെയും നിയോഗിച്ചിട്ടുണ്ട്.
കൗണ്ടിംഗ് ഉദ്യോഗസ്ഥർ, ഡ്യൂട്ടിയിലുള്ള റിട്ടേണിംഗ് ഓഫീസർ, അസിസ്റ്റന്റ് റിട്ടേണിംഗ് ഓഫീസർ, സംസ്ഥാന ഇലക്ഷൻ കമ്മിഷൻ പാസ് അനുവദിച്ചിട്ടുള്ള ഫോട്ടോഗ്രാഫർ, വീഡിയോഗ്രാഫർ, സ്ഥാനാർത്ഥികൾ, കൗണ്ടിംഗ് പാസ് ലഭിച്ച ഏജന്റുമാർ എന്നിവർക്കായിരിക്കും വോട്ടെണ്ണൽ കേന്ദ്രത്തിലേക്ക് പ്രവേശനം.
പോസ്റ്റൽ ബാലറ്റുകൾ റിട്ടേണിംഗ് ഓഫീസർമാരുടെ ടേബിളിലാണ് എണ്ണുക. വോട്ടെണ്ണൽ ദിവസം രാവിലെ എട്ടു മണിയ്ക്കുള്ളിൽ ലഭിക്കുന്ന പോസ്റ്റൽ ബാലറ്റുകളേ പരിഗണിക്കൂ. ശേഷം ലഭിക്കുന്നവ തുറക്കാതെ സീൽ ചെയ്ത് മാറ്റിവെക്കും. പോസ്റ്റൽ ബാലറ്റുകൾ എണ്ണുന്നതോടൊപ്പം തന്നെ ഇലക്ട്രോണിക് വോട്ടിംഗ് മെഷീനിലെ വോട്ടുകളും എണ്ണിത്തുടങ്ങും.
കൗണ്ടിംഗ് സെന്ററുകൾ ഇവ
1. കോഴിക്കോട് കോർപ്പറേഷൻ - നടക്കാവ് ഗവ. വൊക്കേഷണൽ ഹയർ സെക്കൻഡറി സ്‌കൂൾ
2. രാമനാട്ടുകര മുനിസിപ്പാലിറ്റി - ഫറോക്ക് കോളേജ് ഓഡിറ്റോറിയം
3. മുക്കം മുനിസിപ്പാലിറ്റി - നീലേശ്വരം ഗവ ഹയർ സെക്കൻഡറി സ്‌കൂൾ
4. ഫറോക്ക് മുനിസിപ്പാലിറ്റി - ഫറോക്ക് മുനിസിപ്പൽ ടൗൺ ഹാൾ
5. കൊയിലാണ്ടി നഗരസഭ - കൊയിലാണ്ടി ഗവ. വൊക്കേഷണൽ ഹയർ സെക്കൻഡറി സ്‌കൂൾ
6. പയ്യോളി നഗരസഭ - പയ്യോളി ടെക്‌നിക്കൽ സ്‌കൂൾ
7. വടകര മുനിസിപ്പാലിറ്റി - വടകര ടൗൺഹാൾ
8. കൊടുവള്ളി നഗരസഭ - കൊടുവള്ളി ഗവ. ഹയർ സെക്കൻഡറി സ്‌കൂൾ
9. ബാലുശേരി ബ്ലോക്ക് പഞ്ചായത്ത് പരിധിയിൽ വരുന്ന ഗ്രാമപഞ്ചായത്തുകൾ - ബാലുശ്ശേരി വി.എച്ച്.എസ്.എസ്
10. ചേളന്നൂർ ബ്ലോക്ക് പഞ്ചായത്ത് - വെസ്റ്റ് ഹിൽ ഗവ. പോളിടെക്‌നിക് കോളേജ്
11. കുന്ദമംഗലം ബ്ലോക്ക് - മലബാർ ക്രിസ്ത്യൻ കോളേജ്
12. കോഴിക്കോട് ബ്ലോക്ക് - സാമൂതിരി ഹയർ സെക്കഡറി സ്‌കൂൾ
13. പേരാമ്പ്ര ബ്ലോക്ക് - പേരാമ്പ്ര സി.കെ.ജി മെമ്മോറിയൽ ഗവ. കോളേജ്
14. തോടന്നൂർ ബ്ലോക്ക് - വടകര സെന്റ് ആന്റണീസ് ഗേൾസ് ഹയർ സെക്കൻഡറി സ്‌കൂൾ
15. മേലടി ബ്ലോക്ക് - പയ്യോളി ഗവ. വൊക്കേഷണൽ ഹയർ സെക്കൻഡറി സ്‌കൂൾ
16. പന്തലായനി ബ്ലോക്ക് - കൊയിലാണ്ടി ഗവ. മാപ്പിള വെക്കേഷണൽ ഹയർ സെക്കൻഡറി സ്‌കൂൾ
17. വടകര ബ്ലോക്ക് - മടപ്പള്ളി കോളേജ്
18. തൂണേരി ബ്ലോക്ക് - പുറമേരി കടത്തനാട് രാജാസ് ഹയർസെക്കൻഡറി സ്‌കൂൾ
19. കുന്നുമ്മൽ ബ്ലോക്ക് വട്ടോളി നാഷണൽ ഹയർ സെക്കൻഡറി സ്‌കൂൾ
20. കൊടുവള്ളി ബ്ലോക്ക് കൊടുവള്ളി കെ.എം.ഒ ഹയർ സെക്കൻഡറി സ്‌കൂൾ