ചങ്ങനാശേരി : തദ്ദേശ സ്വയം ഭരണ സ്ഥാപനങ്ങളിലേയ്ക്ക് രണ്ടാംഘട്ടത്തിൽ നടന്ന തെരഞ്ഞെടുപ്പിന്റെ വോട്ടെണ്ണൽ 16ന് രാവിലെ 8 മുതൽ ചങ്ങനാശേരിയിൽ രണ്ട് കേന്ദ്രങ്ങളിലായി ആരംഭിക്കും. ആദ്യ ഫലം പത്തുമണിയോടെ പുറത്താവും. കൊവിഡ് മാനദണ്ഡങ്ങൾ പാലിച്ചാണ് വോട്ടെണ്ണൽ നടത്തുന്നത്. ചങ്ങനാശേരി നഗരസഭയുടെ വോട്ടെണ്ണൽ കേന്ദ്രം നഗരസഭയിലും മാടപ്പള്ളി ബ്ലോക്കിനു കീഴിൽ വരുന്ന അഞ്ച് പഞ്ചായത്തുകളുടെ വോട്ടെണ്ണൽ നടക്കുന്നത് ചങ്ങനാശേരി എസ് ബി ഹൈസ്‌കൂളിലുമായിരിക്കും.

പോസ്റ്റൽ വോട്ടുകളാണ് ആദ്യം എണ്ണുക. ഗ്രാമ- ബ്ലോക്ക്-ജില്ല പഞ്ചായത്തുകളിലെ പോസ്റ്റൽ വോട്ടുകൾ അതാത് വരണാധികാരികളാണ് എണ്ണുക. വോട്ടെണ്ണൽ കേന്ദ്രങ്ങളിൽ സജ്ജീകരിച്ചിട്ടുള്ള മേശകളുടെ എണ്ണം അനുസരിച്ചായിരിക്കും സ്ട്രോംഗ് റൂമുകളിൽ നിന്ന് കൺട്രോൾ റൂമിൽ എത്തിക്കുന്നത്. വോട്ടെണ്ണൽ ആരംഭിക്കുന്നത് വാർഡ് ക്രമത്തിലായിരിക്കും. വാർഡിൽ ഒന്നിലധികം ബൂത്തുകൾ ഉണ്ടെങ്കിൽ അവ ഒരു ടേബിളിലാണ് എണ്ണുന്നത്. ഓരോ ടേബിളിലും ഒരു കൗണ്ടിംഗ് സൂപ്പർവൈസറും രണ്ട് കൗണ്ടിംഗ് അസിസ്റ്റന്റുമാരും നഗരസഭകളിൽ ഒന്നു വീതവുമായിരിക്കും ഉണ്ടായിരിക്കുന്നത്. ഇവരെ കൂടാതെ സ്ഥാനാർത്ഥികളുടെ ഏജന്റുമാരും ടേബിളുകളിൽ ഉണ്ടായിരിക്കും.

37 വാർഡുകളുള്ള ചങ്ങനാശേരി നഗരസഭയിൽ ആറ് ടേബിളുകളിലായി ആറ് റൗണ്ട് വോട്ടെണ്ണൽ നടത്തി ഫലപ്രഖ്യാപനം നടത്തും. മാടപ്പള്ളി, വാഴപ്പള്ളി, പായിപ്പാട്, തൃക്കൊടിത്താനം, കുറിച്ചി പഞ്ചായത്തുകളിലെ 199 ബൂത്തുകളിലെ വോട്ടെണ്ണൽ 25 ടേബിളുകളിലായി എട്ട് റൗണ്ട് എണ്ണം പൂർത്തിയാക്കി ഫലപ്രഖ്യാപനം നടത്തും. ഒരു റൗണ്ടിൽ 25 ബൂത്തുകളുടെ വോട്ടെണ്ണലാണ് ഇവിടെ നടക്കുന്നത്.

ഓരോ കേന്ദ്രങ്ങളിലെയും വോട്ടെണ്ണൽ പുരോഗതി ഉച്ചഭാഷിണിയിലൂടെ അറിയിക്കും. കൂടാതെ, ഇലക്ഷൻ കമ്മീഷന്റെ ട്രെൻഡ് സോഫ്റ്റ് വെയറിൽ തത്സമയം അപ് ലോഡ് ചെയ്യും. ത്രിതല പഞ്ചായത്തുകളിലെ വോട്ടെണ്ണൽ ബ്ലോക്ക് തലത്തിലുള്ള വിതരണ കേന്ദ്രങ്ങളിൽ നടക്കും. നഗരസഭയുടെ അതാത് സ്ഥാപനങ്ങളുടെ വിതരണകേന്ദ്രത്തിലും നടക്കും.

വോട്ടെണ്ണൽ കേന്ദ്രത്തിലെ അടിസ്ഥാന സൗകര്യങ്ങൾ ഒരുക്കുന്നത് അതാത് തദേശ സ്വയം ഭരണ സ്ഥാപന സെക്രട്ടറിമാരാണ്. ബ്ലോക്ക് പഞ്ചായത്ത് വരണാധികാരിക്ക് ഒരു ഹാളും ബ്ലോക്ക് പഞ്ചായത്ത് പരിധിയിൽ ഗ്രാമപഞ്ചായത്തുകൾക്ക് പ്രത്യേക കൗണ്ടിംഗ് ഹാളുകളും സജ്ജീകരിക്കും. എന്നാൽ, നഗരസഭയിലെ ഓരോ വരണാധികാരിക്കും പ്രത്യേക കൗണ്ടിംഗ് ഹാൾ ഉണ്ടായിരിക്കും. പരമാവധി എട്ട് പോളിംഗ് സ്റ്റേഷനുകൾക്ക് ഒരു ടേബിൾ എന്ന രീതിയിലാണ് കൗണ്ടിംഗ് ടേബിളുകൾ സജ്ജീകരിക്കുന്നത്.