പെരുമ്പനച്ചി തോട്ടയ്ക്കാട് റോഡിൽ യാത്രാദുരിതം

ചങ്ങനാശേരി: കണ്ണെത്തുന്നിടതെല്ലാം കുഴികൾ. വാഹനത്തിലാണ് യാത്രയെങ്കിൽ നടുവൊടിയും. ഒപ്പം വാഹനങ്ങൾ കുഴികളിൽ ചാടി അപകടങ്ങളും.

പെരുമ്പനച്ചി തോട്ടയ്ക്കാട് റോഡ് മാസങ്ങളായി തകർന്നനിലയിലാണ്. മാന്നില പുളിയാങ്കുന്ന് റോഡ് മുതൽ തോട്ടയ്ക്കാട് വരെയുള്ള ഭാഗങ്ങളിൽ വലുതും ചെറുതുമായ നിരവധി കുഴികളാണ് രൂപപ്പെട്ടിരിക്കുന്നത്. ടാറിംഗ് ഇളകി മാറി മെറ്റലും ചരലും നിറഞ്ഞ നിലയിലാണ്. ഇരുചക്രവാഹനങ്ങൾ നിയന്ത്രണം വിട്ട് അപകടത്തിൽപ്പെടുന്നതും പതിവാണ്. പുളിയാങ്കുന്ന് റോഡിൽ പൈപ്പ് പൊട്ടൽ പതിവാകുന്നതിനാൽ ഈ ഭാഗത്ത് റോഡിന്റെ വശങ്ങൾ ഇടിഞ്ഞ നിലയിലാണ്. റോഡിൽ വഴിവിളക്കുകൾ ഇല്ലാത്തതിനാൽ അപകടസാധ്യതയും ഏറുന്നു. വഴിനീളെ കുഴികളായതിനാൽ ഇതിൽ ചാടി വാഹനങ്ങൾക്ക് കേടുംപാടുകളും സംഭവിക്കുന്നതായും പരാതിയുണ്ട്.

നടപ്പാതയില്ല

നടപ്പാതയില്ലാത്തതിനാൽ കാൽ നടയാത്ര അപകടഭീഷണി ഉയർത്തുന്നു. പരാതികളെ തുടർന്ന് ചില കുഴികൾ അടച്ചെങ്കിലും വീണ്ടും പഴയ അവസ്ഥയിലായി. മഴക്കാലത്ത് കുഴികളിൽ വെള്ളംക്കെട്ടും രൂക്ഷമാണ്. വേനൽക്കാലത്ത് പൊടിശല്യം രൂക്ഷമാണ്. റോഡ് റീടാർ ചെയ്ത് സഞ്ചാരയോഗ്യമാക്കണമെന്ന ആവശ്യം ശക്തമാണ്.