പാലാ: പാലാ നിയോജകമണ്ഡലത്തിൽ എൽ.ഡി.എഫ് മേൽക്കൈ നേടിയതായി കേരളാ കോൺഗ്രസ് (എം) നിയോജക മണ്ഡലം നേതൃയോഗം വിലയിരുത്തി. പാലാ നഗരസഭയും പാലാമണ്ഡലത്തിൽ ഉൾപ്പെടുന്ന ളാലം, ഉഴവൂർ ബ്ലോക്ക് പഞ്ചായത്തുകളിലും ആറ് ഗ്രാമപഞ്ചായത്തുകളും എൽ.ഡി.എഫ് പിടിച്ചെടുത്തു.കേ.കോൺഗ്രസ് (എം) നേതാക്കളായ മുൻ രാമപുരം പഞ്ചായത്ത് പ്രസിഡന്റ് ബൈജു പുതിയിടത്തുചാലിൽ ഉഴവൂരും, റൂബി ജോസ് ളാലത്തും ബ്ലോക്ക് പഞ്ചായത്ത് പ്രസിഡന്റുമാരായി തെരഞ്ഞെടുക്കപ്പെട്ടു. ഉഴവൂരും, ളാലത്തും ബ്ലോക്കുകളിൽ കേ.കോൺ.(എം) ന് ഒറ്റയ്ക്ക് ഭൂരിപക്ഷമുണ്ട്. തലനാട്, കടനാട്, കരൂർ, കൊഴുവനാൽ, മീനച്ചിൽ, എലിക്കുളം പഞ്ചായത്തുകളിലും എൽ.ഡി.എഫ് ഭരണം നേടിയതായി നേതാക്കൾ പറഞ്ഞു. യോഗത്തിൽ ഫിലിപ്പ് കുഴികുളം അദ്ധ്യക്ഷത വഹിച്ചു. ജോസ് ടോം, .നഗരസഭാദ്ധ്യക്ഷൻ ആന്റോ പടിഞ്ഞാറേക്കര,തോമസ് ആന്റണി, ഔസേപ്പച്ചൻ വാളിപ്ലാക്കൽ, പെണ്ണമ്മ ജോസഫ്, ബൈജു കൊല്ലംപറമ്പിൽ,​അഡ്വ.ജയ്‌മോൻ പരിപ്പീറ്റത്തോട്ട്, ടോബിൻ കണ്ടനാട്ട്, ജയ്‌സൺ മാന്തോട്ടം എന്നിവർ പ്രസംഗിച്ചു.