കോട്ടയം : കൊവിഡ് ഗവേഷണ പദ്ധതികൾക്ക് ഊന്നൽ നൽകിയും ഭക്ഷ്യ പരിശോധന ലാബോറട്ടറിയും സ്‌പോർട്‌സ് ഹബും അത്യാധുനിക ലൈബ്രറി സമുച്ചയവും പ്രസും നിർമിക്കാനുള്ള നവീന പദ്ധതികൾ മുന്നോട്ടുവച്ചും എം.ജി സർവകലാശാല ബഡ്ജറ്റ്. വൈസ് ചാൻസലർ പ്രൊഫ. സാബു തോമസിന്റെ അദ്ധ്യക്ഷതയിൽ കൂടിയ സിൻഡിക്കേറ്റ് യോഗത്തിൽ 654.13 കോടി രൂപ വരവും 709.68 കോടി രൂപ ചെലവും പ്രതീക്ഷിക്കുന്ന ബഡ്ജറ്റ് സാമ്പത്തികാര്യ ഉപസമിതി കൺവീനറും കൊച്ചി മേയറുമായ അഡ്വ.എം. അനിൽകുമാർ അവതരിപ്പിച്ചു.
കൊവിഡ് ഗവേഷണവുമായി ബന്ധപ്പെട്ട അഞ്ചു ഗവേഷണ പദ്ധതികൾ പ്രോത്സാഹിപ്പിക്കുന്നതിനായി 1.69 കോടി രൂപ വകയിരുത്തി. കൊവിഡിൽ അക്കാഡമിക രംഗത്ത് ബുദ്ധിമുട്ട് നേരിടുന്ന വിദ്യാർത്ഥികൾക്ക് സഹായം ലഭ്യമാക്കുന്നതിനായി 20 ലക്ഷം രൂപ ചെലവഴിക്കും. ഭക്ഷ്യ പരിശോധനയ്ക്കും ഗുണനിലവാരം ഉറപ്പാക്കാനും സർവകലാശാലയിൽ എൻ.എ.ബി.എൽ. അംഗീകാരത്തോടെ ഭക്ഷ്യ പരിശോധന ലബോറട്ടറി സ്ഥാപിക്കാൻ രണ്ടുകോടി രൂപ ചെലവഴിക്കും. അഞ്ചു കോടി രൂപ ചെലവഴിച്ച് സർവകലാശാലയിൽ അത്യാധുനിക ലൈബ്രറി സമുച്ചയം നിർമിക്കും. വിദ്യാർത്ഥികൾ പ്രവേശനം നേടുന്നത് മുതൽ ബിരുദ സർട്ടിഫിക്കറ്റ് ലഭ്യമാകുന്നതുവരെയുള്ള എല്ലാ സേവനങ്ങളും ഓൺലൈനാക്കുന്നതിനായി സമഗ്രമായ സോഫ്റ്റ്‌വെയർ സ്ഥാപിക്കുന്നതിനായി ഒരു കോടി രൂപ വകയിരുത്തി.
മറ്റ് പദ്ധതികൾ
പഠനത്തോടൊപ്പം വരുമാനവും ഉറപ്പാക്കാൻ പദ്ധതി
പി.ജി, ഗവേഷണ വിദ്യാർത്ഥികൾക്ക് പെയ്ഡ്കരാർ ലക്ചറർ അവസരം
പ്രകൃതിദത്ത നാരുകളിൽ നിന്ന് മൂല്യവർദ്ധിത ഉത്പന്നങ്ങൾക്കുള്ള കേന്ദ്രം
സ്റ്റുഡന്റ്‌സ് അമിനിറ്റീസ് ആൻഡ് ഇൻക്യുബേഷൻ സെന്റർ
എസ്.സി./എസ്.ടി, ട്രാൻസ്‌ജെൻഡർ വിദ്യാർത്ഥികൾക്ക് രാജ്യാന്തര സെമിനാറുകളിലും മത്സരപ്പരീക്ഷകളിലും കായിക മത്സരങ്ങളിലും പരിശീലനത്തിലും പങ്കെടുക്കുന്നതിന് ധനസഹായം നൽകാൻ 1.05 കോടി രൂപ ചെലവിൽ പ്രത്യേക പദ്ധതി
നൂതനവിജ്ഞാന മേഖലകളിൽ അദ്ധ്യാപനവും ഗവേഷണവും പ്രോത്സാഹിപ്പിക്കാൻ യു.ജി.സി പ്ലീസ് പദ്ധതിക്ക് 5 കോടി
ഉന്നതവിദ്യാഭ്യാസ കേന്ദ്രങ്ങളെ അതിവേഗ ഡേറ്റ നെറ്റ്‌വർക്കിലൂടെ ബന്ധിപ്പിക്കാൻ അപ്‌ഗ്രേഡിംഗ് നാഷണൽ നോളഡ്ജ് നെറ്റ്‌വർക്ക് ഫെസിലിറ്റിക്ക് 25 ലക്ഷം
സർവകലാശാലയിൽ അത്യാധുനിക പ്രസ് സ്ഥാപിക്കാൻ ആദ്യഘട്ടം രണ്ടു കോടി
സർവകലാശാല സേവനങ്ങൾ ആധുനികവത്കരിക്കാൻ ഓഫീസ് ഓട്ടോമേഷന് ആറു കോടി
മുൻ വി.സി ഡോ. യു.ആർ. അനന്തമൂർത്തിയുടെ സ്മരണാർഥം സർവകലാശാലയിൽ ഓപ്പൺ എയർ ഓഡിറ്റോറിയം
സ്‌റ്റേഡിയം നവീകരിക്കും സ്‌പോർട്‌സ് ഹബിനായി മൂന്നു കോടി
ശുചിത്വമുറപ്പാക്കാൻ ഗ്രീൻ കാമ്പസ് സീറോ വേസ്റ്റ് കാമ്പസ് പദ്ധതി