ന്യൂയോർക്ക്: ലോകത്ത് കൊവിഡ് രോഗികളുടെ എണ്ണം കുതിച്ചുയരുന്നു. 5,67,538 പുതിയ കേസുകളാണ് റിപ്പോർട്ട് ചെയ്തത്.വേൾഡോമീറ്ററിന്റെ കണക്കുപ്രകാരം ആകെ രോഗബാധിതരുടെ എണ്ണം ആറ് കോടി നാൽപത്തിയൊന്ന് ലക്ഷം കടന്നു. 14,85,672 പേർ മരിച്ചു. രോഗമുക്തി നേടിയവരുടെ എണ്ണം 4,44,28,145 ആയി ഉയർന്നു. അമേരിക്ക, ഇന്ത്യ, ബ്രസീൽ, റഷ്യ, ഫ്രാൻസ് തുടങ്ങിയ രാജ്യങ്ങളിലാണ് രോഗവ്യാപനം ഏറ്റവും രൂക്ഷം.

രോഗികളുടെ എണ്ണത്തിൽ ഒന്നാം സ്ഥാനത്തുള്ള അമേരിക്കയിൽ, ഒരു കോടി നാൽപത്തിയൊന്ന് ലക്ഷം കൊവിഡ് ബാധിതരാണ് ഉള്ളത്.1,77,868 പേർക്ക് പുതുതായി രോഗം സ്ഥിരീകരിച്ചു.2,76,928 പേർ മരണമടഞ്ഞു.ഇതുവരെ എൺപത്തിമൂന്ന് ലക്ഷം പേർ മാത്രമാണ് രോഗമുക്തി നേടിയത്.

ഇന്ത്യയിൽ കൊവിഡ് മരണം 1.38 ലക്ഷം പിന്നിട്ടു. കഴിഞ്ഞ ദിവസം 31,118 പേർക്ക് കൊവിഡ് സ്ഥിരീകരിച്ചു. രോഗബാധിതരുടെ എണ്ണം തൊണ്ണൂറ്റിനാല് ലക്ഷം കടന്നു.നിലവിൽ 4,27,524 പേരാണ് ചികിത്സയിലുള്ളത്.89 ലക്ഷം പേർ രോഗമുക്തി നേടി.

ബ്രസീലിൽ അറുപത്തിമൂന്ന് ലക്ഷത്തിലധികം പേർക്കാണ് ഇതുവരെ കൊവിഡ് സ്ഥിരീകരിച്ചത്.1,73,862 പേർ മരിച്ചു. അമ്പത്തിയാറ് ലക്ഷം പേർ രോഗമുക്തി നേടി. റഷ്യയിൽ 23 ലക്ഷം പേർക്കും, ഫ്രാൻസിൽ 22 ലക്ഷത്തോളം പേർക്കുമാണ് വൈറസ്ബാധ സ്ഥിരീകരിച്ചത്.