തിരുവനന്തപുരം: ബംഗാൾ ഉൾക്കടലിൽ രൂപം കൊണ്ട ബുറേവി ചുഴലിക്കാറ്റിന്റെ ശക്തി കുറഞ്ഞതായി കേന്ദ്ര കാലവസ്ഥാ നിരീക്ഷണ കേന്ദ്രം. ചുഴലിക്കാറ്റ് ഒരു അതിതീവ്ര ന്യൂനമർദമായതായും കാലാവസ്ഥ വകുപ്പ് അറിയിച്ചു. നിലവിൽ ബുറേവി ചുഴലിക്കാറ്റ് മാന്നാർ കടലിടുക്കിലാണ് ഉള്ളത്. തമിഴ്നാട് രാമനാഥപുരത്തിനടുത്തു വച്ചാണ് ചുഴലിക്കാറ്റിന്റെ ശക്തി കുറഞ്ഞ് ഒരു തീവ്ര ന്യൂനമർദമായി മാറിയതെന്നും കാലവസ്ഥ വകുപ്പ് വ്യക്തമാക്കി.ഇന്ന് അർദ്ധരാത്രിയോടെ തന്നെ ചുഴലിക്കാറ്റ് തീരം തൊടും.

അതേസമയം ബുറേവി ചുഴലിക്കാറ്റിന്റെ സഞ്ചാരപഥത്തിലുള്ള അഞ്ചു ജില്ലകളിൽ നാളെ സർക്കാർ അവധി പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ, ഇടുക്കി ജില്ലകൾക്കാണ് പൊതു അവധി. പൊതു മേഖലാ സ്ഥാപനങ്ങൾ ഉൾപ്പെടെയുള്ള ഓഫീസുകൾക്കും അവധി നൽകിയിട്ടുണ്ട്. ദുരന്ത നിവാരണം, അവശ്യ സർവീസുകൾ, തിരഞ്ഞെടുപ്പ് ചുമതലകൾ എന്നിവയ്ക്ക് അവധി ബാധകമാല്ല.