ന്യൂ‌ഡൽഹി: പതിനായിരത്തിലേറെ തീരെ ചെറിയ രത്നങ്ങൾ ചേർത്ത ഒരു വജ്രമോതിരം ഇപ്പോൾ ഗിന്നസ് ബുക്കിൽ ഇടം പിടിച്ചിരിക്കുകയാണ്. ഏ‌റ്റവുമധികം രത്നങ്ങൾ ഉപയോഗിച്ചതിനുള‌ള റെക്കോർഡാണ് ഈ മോതിരത്തിനുള‌ളത്. 12,638 ചെറു രത്നങ്ങൾ ചേർത്താണ് പൂവിന്റെ ആകൃതിയിലുള‌ള ഈ മോതിരം നിർമ്മിച്ചിരിക്കുന്നത്. മാരിഗോൾഡ് എന്ന് പേരിട്ടിരിക്കുന്ന ഈ മോതിരം വിൽക്കാൻ പക്ഷെ അത് നിർമ്മിച്ച ഹർഷിത് ബൻസലിന് താൽപര്യമില്ല. തന്റെ സ്വപ്‌ന പദ്ധതിയായിരുന്നു ഈ മോതിരത്തിന്റെ നിർമ്മാണമെന്നും ബൻസൽ പറയുന്നു. രണ്ട് വർഷം മുൻപ് ജ്വല്ലറി ഡിസൈനിംഗ് പഠിക്കുമ്പോൾ തനിക്ക് തോന്നിയ ആശയമാണ് ഈ മോതിരമെന്ന് ഹർഷിത് പറഞ്ഞു. എട്ട് പാളികളായുള‌ള ജമന്തിപൂവിന്റെ ആകൃതിയുള‌ള ഈ മോതിരത്തിന്റെ ഡിസൈൻ വളരെയധികം പ്രത്യേകതയുള‌ളതാണ്. നിരവധി പേർ മോതിരം വാങ്ങാനായി തന്നെ സമീപിച്ചെന്നും ബൻസൽ പറയുന്നു.

മുൻപ് ഏ‌റ്റവുമധികം രത്നങ്ങളുള‌ള മോതിരവും ഇന്ത്യയിൽ നിന്നായിരുന്നു. 7801 ചെറു രത്നങ്ങളായിരുന്നു ഈ മോതിരം നിർമ്മിക്കാനായി ഉപയോഗിച്ചിരുന്നത്. ഈ റെക്കോർഡിനെ ബഹുദൂരം പിന്നിലാക്കിയിരിക്കുകയാണ് പുതിയ മോതിരം.